استاناداعى 29 جاستاعى BMW جۇرگىزۋشىسى ءۇش ايدا 87 رەت جول قوزعالىسى ەرەجەسىن بۇزعان. سوت ونى 15 تاۋلىككە قاماۋعا الدى، دەپ حابارلايدى infohub.kz سايتى.
«ءقاۋىپسىز جول» جەدەل-پروفيلاكتيكالىق ءىس-شاراسى بارىسىندا پوليسيا قىزمەتكەرلەرى بيىلعى ناۋرىزدان ماۋسىمعا دەيىن 87 اكىمشىلىك قۇقىقبۇزۋشىلىق جاساعان 29 جاستاعى BMW جۇرگىزۋشىسىن انىقتادى. استانا قالالىق پوليسيا دەپارتامەنتىنىڭ مالىمەتىنشە، 55 رەت كامەرالار بەلگىلەنگەن جىلدامدىقتىڭ اسىرىلعانىن تىركەگەن، تاعى 32 رەت اۆتوكولىك مارشرۋتتىق كولىككە ارنالعان جولاقپەن قوزعالعان.
پوليسيا بىرنەشە مىسال كەلتىردى. ناۋرىز ايىندا تۇران داڭعىلى مەن اقمەشىت كوشەسىندە اۆتوكولىك بىرنەشە رەت 129–131 كم/ساع جىلدامدىقپەن قوزعالعان. ماۋسىمدا ع. مۇستافين كوشەسىندە جىلدامدىق 126 كم/ساع، ال ك. مۇحامەدحانوۆ كوشەسىندە رۇقسات ەتىلگەن 60 كم/ساع كەزىندە 151 كم/ساع-قا جەتكەن.
«جۇيەلى تۇردە قۇقىققا قارسى ارەكەتتەرى جانە قوعامعا اشىق تۇردە قۇرمەتسىزدىك بىلدىرگەنى ءۇشىن پوليسيا قىزمەتكەرلەرى قۇقىقبۇزۋشىنى ۇساق بۇزاقىلىق فاكتىسى بويىنشا اكىمشىلىك جاۋاپكەرشىلىككە تارتتى»، — دەپ قوستى پوليسيا دەپارتامەنتىندە. سوت شەشىمىمەن ەر ادام 15 تاۋلىككە قامالدى.
پوليسيا جول قوزعالىسى ەرەجەلەرىن جۇيەلى تۇردە بۇزۋ، اگرەسسيۆتى جۇرگىزۋ مانەرى جانە باسقا جول قوزعالىسىنا قاتىسۋشىلارعا ءقاۋىپ ءتوندىرۋ جازاسىز قالمايتىنىن ەسكەرتتى.