قازاقستان استاناسىندا پوليسەيلەر ەسىرتكى تاراتۋعا قاتىسى بار دەگەن كۇدىكپەن 32 جاستاعى ەر ادامدى ۇستادى. ءتىنتۋ كەزىندە ودان ەكى كەلىدەن استام تىيىم سالىنعان زات الىندى، دەپ حابارلايدى infohub.kz سايتى.
ۇستاۋ «قاراسورا» جەدەل-پروفيلاكتيكالىق ءىس-شاراسى اياسىندا جۇرگىزىلدى. قۇقىق قورعاۋ ورگاندارىنىڭ مالىمەتىنشە، ەر ادام جالدامالى كولىكتە جۇرگەن جانە تۇرعىن ۇيلەردىڭ ءبىرىنىڭ جانىندا توقتاتىلعان.
ونىڭ ريۋكزاگىنەن اق ۇنتاق ءتارىزدى زات سالىنعان پوليەتيلەن پاكەت تابىلدى. ساراپتاما قورىتىندىسى بويىنشا، بۇل — سالماعى شامامەن ءبىر كەلى الفا-PVP.
كۇدىكتىنىڭ تۇرعىلىقتى مەكەنجايى بويىنشا جۇرگىزىلگەن ءتىنتۋ كەزىندە اسۇيدەگى شكافتان قۇرامىندا مەفەدرون مەن كاننابيس شايىرى بار تاعى ەكى پلاستيك ىدىس تابىلدى. تاركىلەنگەن ەسىرتكى زاتتارىنىڭ جالپى سالماعى ەكى كەلىدەن استى.
تەرگەۋ نۇسقاسى بويىنشا، ۇستالعان ادام «قويما» ءرولىن اتقارعان — ەسىرتكىنى ساقتاپ، ولاردى تاراتۋمەن اينالىسقان باسقا ادامدارعا بەرىپ وتىرعان.
وسى فاكتى بويىنشا قىلمىستىق ءىس قوزعالدى. قازىرگى ۋاقىتتا پوليسيا زاڭسىز ارەكەتكە قاتىسقان باسقا دا ىقتيمال ادامداردى انىقتاۋدا.
بۇعان دەيىن الماتىدا پوليسەيلەر سينتەتيكالىق ەسىرتكى ساتتى دەگەن كۇدىكپەن ەر ادامدى ۇستاعانى حابارلانعان بولاتىن. ونىڭ كولىگىنەن جانە جاسىرىن ورىنداردان 170 وراما تابىلسا، كەيىن الماتى وبلىسىندا تاعى ەكى كەلىگە جۋىق تىيىم سالىنعان زات تاركىلەندى. الدىن الا مالىمەتتەرگە سايكەس، ۇستالعان ادام ەسىرتكى تاراتاتىن ينتەرنەت-دۇكەندە جۇمىس ىستەگەن.