بۇگىن وتكەن استانا ماسليحاتىنىڭ وتىرىسىندا اۆتوكولىكتەردى ەۆاكۋاسيالاۋ تاريفتەرىن كوتەرۋ ماسەلەسى تالقىلاندى. دەپۋتاتتار قولدانىستاعى باعالاردى وزگەرتپەۋ تۋرالى شەشىم قابىلدادى، دەپ حابارلايدى infohub.kz.
جول قوزعالىسىن ۇيىمداستىرۋ ورتالىعىنىڭ باسشىسى داۋرەن ءسابيتوۆتىڭ مالىمەتىنشە، اي سايىن استانادا 500-دەن استام اۆتوكولىك ايىپپۇل تۇراعىنا جەتكىزىلەدى. ول اۆتوكولىكتەردى ساقتاۋدان تۇسەتىن كىرىس ولاردى كۇتىپ ۇستاۋ شىعىندارىن ءىشىنارا عانا جاباتىنىن اتاپ ءوتتى. تاسىمالداۋ مەن تۇراق قۇنى 34 مىڭ تەڭگەنى قۇراعاندا، ايىپپۇل تۇراعى ءۇشىن تولەم 3 اەك (12 975 تەڭگە) مولشەرىندە بەلگىلەنگەن. ورتالىق باسشىسى ءسوز سويلەۋ بارىسىندا ءتاريفتى وزىندىك قۇنعا جاقىنداتۋدى ۇسىندى.
الايدا ماسليحات دەپۋتاتتارى بۇل ۇسىنىستى قولداماي، مىندەت — «ادامداردى جازالاۋ ەمەس» ەكەنىن ايتىپ، شىعىنداردى باسقا جەكە تۇراقتار ەسەبىنەن جابۋعا ۇسىنىس جاسادى.
«ازىرگە تاريفتەردى كوتەرمەيمىز، سوندىقتان باسقا ماسەلەلەرمەن اينالىسىڭىزدار — زاڭ بويىنشا ەلەكتروموبيلدەرگە تەگىن تۇراق ماسەلەسى ءالى شەشىلمەگەن. تاريفتەردەن باسقا دا كوپتەگەن پروبلەمالار بار. الدىمەن سولاردى شەشۋدى ۇسىنامىن»، — دەدى ماسليحات ءتوراعاسى تابيعات زەينۋلقابدەن.
ەسكە سالايىق، ءساۋىر ايىنىڭ سوڭىنان باستاپ استانادا توقتاۋ جانە تۇراق ەرەجەلەرىن بۇزعانى ءۇشىن اۆتوكولىكتەردى اقىلى ەۆاكۋاسيالاۋ رەسمي تۇردە قولدانىلا باستادى.