جۇرگىزۋشىلەر الماتى وبلىسىنداعى استانا – قاراعاندى – الماتى تاسجولىنىڭ ءبىر بولىگىندە جوندەۋ جۇمىستارىنا بايلانىستى ۋاقىتشا قوزعالىس شەكتەلەتىنى تۋرالى ەسكەرتىلدى، دەپ حابارلايدى infohub.kz سايتى.
«كازاۆتوجول» ۇلتتىق اۆتوكولىك جولدارى وپەراتورىنىڭ مالىمەتىنشە، الماتى وبلىسىندا رەسپۋبليكالىق ماڭىزى بار KAZ01 استانا – قاراعاندى – الماتى اۆتوموبيل جولىنىڭ ۋچاسكەسىندە جوندەۋ-قۇرىلىس جۇمىستارىنا بايلانىستى كولىك قۇرالدارىنىڭ قوزعالىسى ۋاقىتشا شەكتەلەدى.
شەكتەۋ 2026 جىلعى 17-20 تامىز ارالىعىندا كۇن سايىن ساعات 06:00-دەن 20:00-گە دەيىن 1177 كم (اقساي اۋىلى) – 1186 كم (جىبەك جولى اۋىلى) ۋچاسكەسىندە قولدانىلادى.
«كورسەتىلگەن كەزەڭدە بارلىق تۇردەگى كولىك قۇرالدارىنىڭ قوزعالىسى شەكتەلەدى. جابىق ۋچاسكەنى اينالىپ ءوتۋ ءۇشىن اقساي – بايكەنت، بايكەنت – بورالداي، بورالداي – جىبەك جولى اۆتوموبيل جولدارى بويىنشا بالامالى باعىتتار قاراستىرىلعان»، – دەپ ناقتىلادى «كازاۆتوجول».
جۇرگىزۋشىلەردەن باعىتتارىن الدىن الا جوسپارلاۋدى، ۋاقىتشا شەكتەۋلەردى ەسكەرۋدى جانە جول بەلگىلەرىنىڭ تالاپتارىن ساقتاۋدى سۇرايدى.
«ۋاقىتشا قولايسىزدىقتار ءۇشىن كەشىرىم سۇرايمىز. شەكتەۋلەر جوندەۋ-قۇرىلىس جۇمىستارىن ءقاۋىپسىز جانە ساپالى جۇرگىزۋ ءۇشىن قاجەت»، – دەپ قوستى «كازاۆتوجول».