استانالىق جاس كۋرەر الەۋمەتتىك جەلىدە ءبىر ايداعى تابىسىن جاريالاپ، پايدالانۋشىلار اراسىندا قىزۋ پىكىرتالاس تۋدىردى. جىگىتتىڭ ايتۋىنشا، ول جەتكىزۋ قىزمەتىندە ايىنا 760 مىڭ تەڭگە تاپقان، ءبىراق كۇنىنە 8–12 ساعات كولىكپەن جۇمىس ىستەگەن. ول ءسوزىن قوسىمشاداعى سكرينشوتتارمەن راستاعان، دەپ حابارلايدى infohub.kz.
ەرنار بەينەجازبادا جۇمىسقا بايلانىستى شىعىنداردى دا اتاپ ءوتتى. بەنزينگە شامامەن 50 مىڭ تەڭگە، جول ەرەجەسىن بۇزعانى ءۇشىن ايىپپۇلعا 20 مىڭ تەڭگە، كولىك جۋۋعا 8 مىڭ تەڭگە جۇمسالعان. تاعى 40 مىڭ تەڭگە تۇسكى اسقا كەتكەن، دەگەنمەن پىكىر بىلدىرۋشىلەر بۇل شىعىن كەز كەلگەن جۇمىستا بولاتىنىن ورىندى اتاپ ءوتتى. سونىمەن قاتار، جىگىت اۆتوكرەديتىن وتەۋگە 200 مىڭ تەڭگە جىبەرگەن. وسىلايشا، بارلىق شەگەرىمنەن كەيىن ونىڭ قولىندا شامامەن 443 مىڭ تەڭگە قالعان.
كەيبىر پايدالانۋشىلار جاس جىگىتتىڭ اككاۋنتى قازاقستاندىقتار اراسىندا ونشا تانىمال ەمەس جەتكىزۋ قىزمەتىنىڭ جاسىرىن جارناماسى بولۋى مۇمكىن دەپ بولجادى. العاشقى ۆيدەودا ول 20 شىلدەدە جۇمىس ىستەي باستاعانىن ايتىپ، اپتالىق قورىتىندى شىعارادى، كەيىن ايلىق ەسەپ جاريالايدى. الايدا بۇل جارنامالىق امال بولسا دا، كۋرەر ەڭبەگى تۋرالى قوعامدىق پىكىرتالاستى جوققا شىعارمايدى.
لايىقتى تابىس تابۋ ءۇشىن كۋرەرلەرگە اۋىسىمدا شامامەن 12 ساعات جۇمىس ىستەۋگە تۋرا كەلەتىنى انىق، ال وسى اۋىر فيزيكالىق ەڭبەگى ءۇشىن ولار زياتكەرلىك ماماندىق يەلەرىنەن — عالىمدار مەن ينجەنەرلەردەن كوبىرەك الادى. ءبىر پايدالانۋشى: «مۇنداي رەجيم بىرنەشە ايعا جەتەدى، كەيىن اعزا شارشاپ، كەڭسەدە جۇمىس ىزدەپ، سونى ارماندايسىڭ. جەتكىزۋشى بولۋ — وتە اۋىر جۇمىس. ال ميلليونعا سەنبەيمىن، دالىرەك ايتقاندا، بۇل تۇراقتى بولادى دەپ ويلامايمىن. بىر-ەكى جىلدان كەيىن ال-دارمەن قالمايدى. بۇل تەك جاستارعا، ەڭ كوبى ءبىر جىلعا» دەپ جازدى.
پىكىرلەردە مۇنداي مىسالدار جاستاردى ءبىلىم الۋدان باس تارتىپ، تەز اقشا تابۋعا يتەرمەلەۋى مۇمكىن دەگەن ءقاۋىپ تە ايتىلۋدا. ءبىر پايدالانۋشى: «مۇنى نە ءۇشىن جاريالايتىنىن ەشقاشان تۇسىنبەدىم. جاستاردىڭ جارتىسىن شاتاستىراسىزدار. مەنىڭ 19 جاستاعى ۇلىم وسىعان بايلانىستى وقىماي ءجۇر. جەتكىزۋ مەن تاكسيدە اقشا تابامىن دەيدى. قىزىم دا بۇرىن داياشى بولۋدى سۇراعان، رۇقسات بەرمەدىم، ءبىراق كەيىن ول وزىنە ۇنايتىن فلوريست جۇمىسىن تاپتى. وقيدى دا، سۇيىكتى جۇمىسىنا بارادى» دەپ جازدى.
بۇعان دەيىن Kursiv LifeStyle قازاقستاندا تاكسي جۇرگىزۋشىلەرى مەن كۋرەرلەردى ايەل كليەنتتەرمەن كاسىبي قارىم-قاتىناسقا ۇيرەتۋ جوسپارلانعانىن حابارلاعان.