استانادا LRT قۇرىلىسىنا جىل باسىنان بەرى 300 ملرد تەڭگەدەن استام قاراجات جۇمسالعان بولۋى مۇمكىن، دەپ حابارلايدى infohub.kz سايتى.
اناليتيكتەردىڭ ەسەپتەۋىنشە، بيىلعى سەگىز ايدا ەلوردالىق LRT قۇرىلىسىنا 300 ملن تەڭگەدەن استام قارجى كەتكەن بولۋى مۇمكىن، دەپ جازادى NUR.KZ ءبىرىنشى كرەديتتىك بيۋروعا سىلتەمە جاساپ.
اناليتيكتەر ۇلتتىق ستاتيستيكا بيۋروسىنىڭ دەرەكتەرىنە سۇيەنە وتىرىپ، جىل باسىنان استانادا تەمىرجول جانە مەترو قۇرىلىسى بويىنشا ورىندالعان جۇمىس كولەمى 306،5 ملرد تەڭگەنى قۇراعانىن مالىمدەدى. بۇل سوما 2025 جىلدىڭ سايكەس كەزەڭىمەن سالىستىرعاندا 2،2 ەسە كوپ (ينفلياسيا ەسەپكە الىنباعان). سوڭعى 10 جىلدا قاڭتار-تامىز ارالىعىندا مۇنداي جوعارى كورسەتكىش العاش رەت تىركەلىپ وتىر.
«ستاتيستيكالىق كورسەتكىشتىڭ استارىندا نەگىزىنەن LRT قۇرىلىسىنا جۇمسالعان ناقتى شىعىندار جاتىر – بۇل استانانىڭ كولىك ينفراقۇرىلىمىن دامىتۋ سالاسىنداعى ەڭ ءىرى جوبا، سوڭعى ۋاقىتتا قارقىندى جۇزەگە اسىرىلىپ كەلەدى»، – دەپ ناقتىلادى بيۋرودا.
وسىلايشا، 16 مامىردا LRT ءبىرىنشى كەزەگى ىسكە قوسىلىپ، اۋەجايدان جاڭا تەمىرجول ۆوكزالىنا دەيىنگى ۋچاسكە پايدالانۋعا بەرىلدى. بىرنەشە كۇن بۇرىن، 3 مامىردا، ەكىنشى كەزەكتىڭ – قوسشى باعىتىنداعى ۋچاسكەنىڭ قۇرىلىسى باستالعانى بەلگىلى بولدى، العاشقى بەتون تىرەك قۇيىلدى.
«اشىق دەرەكتەر LRT ەكىنشى كەزەگىن سالۋ قانشاعا تۇسەتىنىن انىقتاۋعا مۇمكىندىك بەرمەيدى. ايلار بويىنشا ورىندالعان جۇمىس كولەمى ناقتى تۇسىنىك بەرمەيدى، ويتكەنى ەكىنشى كەزەكتىڭ قۇرىلىسى ءبىرىنشى كەزەكتىڭ اياقتالۋىمەن تۇسپا-تۇس كەلدى – ەكى وقيعا دا مامىردا بولدى. سوعان قاراماستان، ەكىنشى كەزەكتىڭ قۇنى قازىرگى تاڭدا قاڭتار-تامىز كولەمىنىڭ كەمىندە جارتىسىنا سايكەس كەلەدى دەپ بولجاۋعا بولادى. سەبەبى، كەزەڭنىڭ جالپى سوماسىنىڭ 47%-ى، ياعني 146،1 ملرد تەڭگە، شىلدە مەن تامىزعا تيەسىلى، ال ماۋسىم كورسەتكىشى نولگە جۋىق»، – دەپ قوستى اناليتيكتەر.
ءبىرىنشى كرەديتتىك بيۋرونىڭ دەرەگىنشە، جالپى العاندا، LRT قۇرىلىسى باستالعان 2017 جىلدان بەرى استانادا تەمىرجول جانە مەترو قۇرىلىسى بويىنشا ورىندالعان جۇمىس كولەمى اعىمداعى باعامەن 756 ملرد تەڭگەنى قۇرادى. ايتا كەتۋ كەرەك، LRT-تەن بولەك، بۇل سوما ەلوردانىڭ تەمىرجول جەلىسىن كەڭەيتۋگە بايلانىستى باسقا دا جوبالارعا جۇمسالعان شىعىنداردى كورسەتۋى مۇمكىن.
ەسكە سالايىق، استانادا Tarlan Astana (LRT) جەلىسىنىڭ تاعى ءۇش جاڭا جەلىسى پايدا بولادى. ونىڭ بىرەۋىنىڭ قۇرىلىسى قوسشى قالاسى باعىتىندا باستالىپ كەتتى.