استانادا وتكەن دەمالىس كۇندەرى پوليسيا قىزمەتكەرلەرى ماس كۇيىندە كولىك تىزگىندەگەن 26 جۇرگىزۋشىنى انىقتادى. سولاردىڭ ءبىرى — ەلوردانىڭ 43 جاستاعى تۇرعىنى، دەپ حابارلايدى infohub.kz سايتى.
ايەلدى تاڭعى ساعات بەس شاماسىندا قورعالجىن تاسجولىندا توقتاتقان. ول Chery كولىگىن تىزگىندەپ كەلە جاتقان. تەكسەرۋ بارىسىندا جۇرگىزۋشىنىڭ ماس كۇيىندە ەكەنى انىقتالعان. پوليسيا مالىمەتىنشە، ول مەرەكەلىك داستارحاننان قايتىپ كەلە جاتقان.
ايەلگە قاتىستى ق ر اكىمشىلىك كودەكسىنىڭ 608-بابىنىڭ 1-بولىگى بويىنشا حاتتاما تولتىرىلعان، دەپ حابارلادى استانا قالالىق پوليسيا دەپارتامەنتى. سوت ءىستى قاراپ، وعان كولىك جۇرگىزۋ قۇقىعىنان 7 جىلعا ايىرۋ جازاسىن تاعايىندادى.
جالپى، وتكەن دەمالىس كۇندەرى پوليسيا قىزمەتكەرلەرى ىشىمدىك ءىشىپ، رۋلگە وتىرعان 26 جۇرگىزۋشىنى انىقتادى. استانا قالالىق پوليسيا دەپارتامەنتى ماس جۇرگىزۋشىلەردى انىقتاۋعا باعىتتالعان پروفيلاكتيكالىق جانە رەيدتىك جۇمىستاردى جالعاستىرۋدا، دەلىنگەن ۆەدومستۆو حابارلاماسىندا.
پوليسيا ەلوردا تۇرعىندارىن ىشىمدىك ىشكەننەن كەيىن رۋلگە وتىرماۋعا جانە باسقالارعا دا جول بەرمەۋگە شاقىردى. ماساڭ كۇيدە كولىك جۇرگىزۋ جۇرگىزۋشىنىڭ وزىنە دە، جول قوزعالىسىنىڭ باسقا قاتىسۋشىلارىنا دا ۇلكەن ءقاۋىپ توندىرەدى. مۇنداي بۇزۋشىلىق قازاقستان رەسپۋبليكاسىنىڭ زاڭناماسىنا سايكەس قاتاڭ جاۋاپكەرشىلىككە اكەپ سوعادى، دەپ اتاپ ءوتتى پوليسيادا.