جاڭا وقۋ جىلىندا ەلوردا مەكتەپتەرى 35 مىڭعا جۋىق ءبىرىنشى سىنىپ وقۋشىسىن قابىلداۋعا دايىندالۋدا، بۇل وتكەن جىلمەن سالىستىرعاندا ءتورت مىڭعا ارتىق، دەپ حابارلايدى infohub.kz سايتى.
ءبىرىنشى سىنىپقا قۇجات قابىلداۋ 28 مامىردا باستالىپ، 31 تامىزعا دەيىن جالعاسادى. استانا قالاسى ءبىلىم باسقارماسىنىڭ مالىمەتىنشە، ءقازىردىڭ وزىندە 30 مىڭنان استام بالا قابىلدانعان.
سالىستىرۋ ءۇشىن: وتكەن وقۋ جىلىندا ءبىرىنشى سىنىپقا 31 مىڭ بالا قابىلدانعان بولاتىن. 2025–2026 وقۋ جىلىنىڭ باسىندا ەلوردادا 206 مەكتەپ جۇمىس ىستەپ، وندا 310 مىڭنان استام وقۋشى ءبىلىم الدى.
سونىمەن قاتار، 2025 جىلى استانادا 28 مىڭ ورىنعا ارنالعان جەتى جاڭا مەكتەپ اشىلدى. جالپى، وقۋ جىلى ىشىندە 15 جاڭا ءبىلىم ورداسىن پايدالانۋعا بەرۋ جوسپارلانعان بولاتىن.
اتا-انالار قۇجاتتاردى «ەلەكتروندىق ۇكىمەت» پورتالى ارقىلى ونلاين نەمەسە مەكتەپكە جەكە بارىپ تاپسىرا الادى. قابىلداۋ ءۇشىن قاجەتتى قۇجاتتار: اتا-انانىڭ نەمەسە زاڭدى وكىلدىڭ ءوتىنىشى؛ «پروفيلاكتيكالىق ەگۋ كارتاسى» (№065/ۋ نىسانى)؛ «بالانىڭ دەنساۋلىق پاسپورتى» (№052-2/ۋ نىسانى)؛ بالانىڭ 3×4 سم كولەمىندەگى سيفرلىق فوتوسۋرەتى. قۇجاتتاردى قاعاز تۇرىندە تاپسىرعان كەزدە اتا-انانىڭ نەمەسە زاڭدى وكىلدىڭ جەكە كۋالىگىنىڭ كوشىرمەسى دە قاجەت بولادى.
بۇعان دەيىن قازاقستاندا 450 مىڭعا جۋىق بالاعا مەكتەپكە دايىندىققا كومەك بەرىلەتىنى حابارلانعان بولاتىن. قولداۋدىڭ ەڭ تومەنگى مولشەرى ءبىر بالاعا 50،8 مىڭ تەڭگەنى قۇرايدى.