قازاقستان پرەمەر-ليگاسىنىڭ 21-تۋرىندا «استانا» ءوز الاڭىندا «وقجەتپەستى» 2:1 ەسەبىمەن جەڭىپ، قولا مەدال ءۇشىن باسەكەدە قارسىلاستارىنان ايىرماسىن سەگىز ۇپايعا جەتكىزدى، دەپ حابارلايدى infohub.kz.
كەزدەسۋ باستالار الدىندا كوماندالار بۇرىنعى تانىمال فۋتبولشى، «استانا» جۇيەسىندە جاس بۋىندى دايىنداعان الەكساندر ءليسيننىڭ ەسىمىن ءبىر مينۋت ۇنسىزدىكپەن ەسكە الدى.
ماچتا ەسەپتى 20-مينۋتتا قوناقتار اشتى: ۋكراينالىق قورعاۋشى بوريس لوتوسكي الاڭ يەلەرىنىڭ قاقپاسىنا دوپ سوقتى. الايدا ۇزىلىسكە دەيىن «استانانىڭ» حورۆات لەگيونەرلەرى كارلو بارتولەس پەن مارين توماسوۆ كومانداسىن العا شىعاردى. گريگوري بابايان شاكىرتتەرى فينالدىق ىسقىرىققا دەيىن جەڭىس ەسەبىن ساقتاپ قالدى.
تۋردىڭ پاراللەلدى ويىندارىندا سەمەيدىڭ «ەلىمايى» پاۆلوداردىڭ «ەرتىسىن» 3:1 ەسەبىمەن ۇتسا، «اتىراۋ» مەن «اقتوبە» تەڭ وينادى (1:1)، «التاي» مەن « قىزىلجار» 2:2 ەسەبىمەن تەڭ ءتۇستى، «ورداباسى» «جەتىسۋدى» 4:0 ەسەبىمەن تاس-تالقان ەتتى، ال «كاسپي» « ۇلىتاۋدى» مينيمالدى ەسەپپەن (1:0) جەڭدى.
«قايرات» پەن «توبىل» قاتىساتىن ويىندار ەۋروكۋبوك ويىندارىنا بايلانىستى كەيىنگە شەگەرىلدى، ولاردىڭ كۇنتىزبەدەگى ورنى كەيىنىرەك انىقتالادى.
چەمپيوناتتىڭ كەلەسى، 22-تۋرى 14-15 تامىزدا وتەدى. سەنبىدە «قايرات» — « ۇلىتاۋ»، «ورداباسى» — «التاي»، «جەڭىس» — «جەتىسۋ» جانە «قايسار» — «اقتوبە» ماچتارى وتەدى. جەكسەنبىدە جانكۇيەرلەر « قىزىلجار» — «استانا»، «اتىراۋ» — «وقجەتپەس»، «ەرتىس» — «توبىل» جانە «كاسپي» — «ەلىماي» كەزدەسۋلەرىن تاماشالايدى.