استانادا تۇراقتا بولعان ءورت سالدارىنان Audi A6 كولىگى جانىپ كەتكەن وقيعا بويىنشا سوت شەشىم شىعاردى. وقيعا 2025 جىلدىڭ مامىر ايىندا بولعان، ال ءورتتىڭ سەبەبى — سوندىرىلمەگەن سىرىڭكە جانە كولىك قۇرالىن پايدالانۋ ەرەجەلەرىنىڭ بۇزىلۋى، دەپ حابارلايدى infohub.kz سايتى.
تاراز قالالىق سوتى كەلتىرىلگەن زالالدى وتەۋ تۋرالى تالاپ-ارىزدى قاراپ، بولعان وقيعاعا ەكى كولىك يەسىنىڭ دە كىنالى ەكەنىن انىقتادى. جاۋاپكەر ءوز كولىگىندە وتىرىپ، تەمەكى تۇتاتىپ، اشىق تەرەزەدەن سوندىرىلمەگەن سىرىڭكەنى لاقتىرىپ جىبەرگەن. سول ساتتە قاسىندا تۇرعان، گازباللوندىق قوندىرعىمەن جابدىقتالعان Audi A6 كولىگى تۇتانىپ كەتكەن.
جۇرگىزىلگەن ساراپتاما ءورتتىڭ سەبەبى تالاپكەردىڭ كولىگىنەن شىققان گاز بۋىنىڭ اعىپ كەتۋىنەن پايدا بولعان گاز-اۋا قوسپاسىنىڭ تۇتانۋى ەكەنىن كورسەتتى. ءىس ماتەريالدارىندا: «تۇتانۋ كوزى جاۋاپكەر لاقتىرعان سوندىرىلمەگەن سىرىڭكە بولدى» دەلىنگەن.
جاۋاپكەرگە قاتىستى قىلمىستىق ءىس قاساقانالىقتىڭ بولماۋىنا بايلانىستى توقتاتىلدى، ال اكىمشىلىك ءىس ەسكىرۋ مەرزىمىنىڭ وتۋىنە بايلانىستى جابىلدى. الايدا بۇل ونى ازاماتتىق-قۇقىقتىق جاۋاپكەرشىلىكتەن بوساتپادى.
سونىمەن قاتار، سوت جانىپ كەتكەن كولىكتىڭ يەسى دە ورەسكەل ابايسىزدىق تانىتقانىن اتاپ ءوتتى. ول ۇزاق ۋاقىت تۇراققا قويار الدىندا ءورت قاۋىپسىزدىگىنىڭ مىندەتتى تالاپتارىن ورىنداماعان، بۇل گازدىڭ اعىپ كەتۋىنە اكەلگەن. سوت شەشىمىندە: «ءورت ەكى سەبەپتىڭ جيىنتىعىنان بولدى: جاۋاپكەردىڭ ابايسىز ارەكەتتەرى جانە تالاپكەر تاراپىنان كولىكتى پايدالانۋ ەرەجەلەرىنىڭ بۇزىلۋى» دەلىنگەن.
تاۋەلسىز باعالاۋ بويىنشا، كەلتىرىلگەن زالال 2،9 ميلليون تەڭگەدەن استى. تاراپتاردىڭ ءارقايسىسىنىڭ كىناسىنىڭ دارەجەسىن ەسكەرە وتىرىپ، سوت تالاپ-ارىزدى ءىشىنارا قاناعاتتاندىرىپ، جاۋاپكەردەن 1،6 ميلليون تەڭگەدەن استام ماتەريالدىق زالال جانە سوت شىعىندارىن ءوندىردى. سوت شەشىمى زاڭدى كۇشىنە ەندى.