10 تامىزعا قاراعان ءتۇنى استانا — پەتروپاۆلوۆسك تاس جولىندا جول-كولىك وقيعاسى بولىپ، جاياۋ جۇرگىنشى قازا تاپتى. Toyota Camry كولىگىنىڭ استىندا قالعان جاياۋ جۇرگىنشى وقيعا ورنىندا كوز جۇمدى، تاعى ءبىر ادام اۋرۋحاناعا جەتكىزىلدى، دەپ حابارلايدى infohub.kz.
اپات سالدارىن كورگەن كۋاگەر Threads الەۋمەتتىك جەلىسىندە تۇنگى ساعات ەكىلەر شاماسىندا استاناعا قاراي كەلە جاتىپ، Qazaq Oil جانارماي قۇيۋ بەكەتىندە توقتاعانىن ايتتى. ونىڭ ايتۋىنشا، جانارماي قۇيۋ ستانسياسىنىڭ جانىندا جولدىڭ ءجۇرۋ بولىگىندە جاتقان ەر ادامدى جانە كولىك جۇرگىزۋشىسىن كورگەن، ول قاتتى شوك كۇيىندە بولعان.
«جانارماي قۇيۋ بەكەتىنىڭ ءدال جانىندا جەردە جۇرگىزۋشى وتىرعان. ول باسىن ۇستاپ، ەسىن جيا الماي جاتتى. ادامنىڭ بولعان وقيعادان كەيىن قاتتى شوك كۇيىندە ەكەنى كورىنىپ تۇردى»، — دەپ جازدى اۆتور.
سونداي-اق، ول وقيعا ورنىندا بولعانداردىڭ سوزىنشە، جاياۋ جۇرگىنشىنىڭ ماس بولىپ، جولعا جۇگىرىپ شىققانىن ايتتى. الايدا كۋاگەردىڭ ءوزى سوققى ءساتىن كورمەگەنىن، سوندىقتان بۇل نۇسقانى راستاي المايتىنىن جەتكىزدى.
اقمولا وبلىستىق پوليسيا دەپارتامەنتى اپات فاكتىسىن راستادى. ۆەدومستۆونىڭ مالىمەتىنشە، وقيعا ساعات 01:45 شاماسىندا استانا — پەتروپاۆلوۆسك تاس جولىنىڭ 234-شاقىرىمىندا بولعان.
«Toyota Camry كولىگىن جۇرگىزىپ كەلە جاتقان جۇرگىزۋشى استانا — پەتروپاۆلوۆسك تاس جولىنىڭ 234-شاقىرىمىندا جولدى بەلگىلەنبەگەن جەردەن كەسىپ وتكەن جاياۋ جۇرگىنشىنى قاعىپ كەتتى. جاياۋ جۇرگىنشى وقيعا ورنىندا قازا تاپتى. ءبىر ايەل جولاۋشى ءارتۇرلى دەنە جاراقاتتارىمەن مەديسينالىق مەكەمەگە جەتكىزىلدى»، — دەپ حابارلادى پوليسيا.
اپات بويىنشا تەرگەۋ جۇرگىزىلۋدە.
بۇعان دەيىن «كۋرسيۆ» قازاقستاندا 2026 جىلدىڭ ءبىرىنشى جارتىجىلدىعىندا 15 مىڭنان استام جول-كولىك وقيعاسى تىركەلىپ، 832 ادام قازا تاپقانىن جازعان بولاتىن. inDrive سەرۆيسىنىڭ دەرەگىنشە، ولىممەن اياقتالعان وقيعالاردىڭ 86 پايىزى ەلدىڭ وڭىرلەرىندە بولعان، ونداعى اپاتتاردىڭ ەداۋىر بولىگى قالاارالىق جولداردا ورىن الادى.