قازاقستاندىقتار الەۋمەتتىك جەلىلەردە پوليسيا قىزمەتكەرلەرىنىڭ ەكى كامەلەتكە تولماعاندى ۇستاعان ۆيدەوسىن بەلسەندى تۇردە تالقىلاپ جاتىر. جاريالانىم اۆتورىنىڭ ايتۋىنشا، وقيعا استانادا بولعان، دەپ حابارلايدى infohub.kz سايتى.
dosansan دەگەن اتپەن بەلگىلى قولدانۋشى Threads الەۋمەتتىك جەلىسىندە پوليسەيلەردىڭ بالالارعا كۇش قولدانعانىن كورسەتەتىن كادرلاردى جاريالادى. «مەنىڭ تۇسىنۋىمشە، پوليسيا قىزمەتكەرلەرى بالالاردى تۇنگى 11-دەن كەيىن ۇستاعان. بالالارعا 23:00-دەن كەيىن شىعۋعا بولمايدى. ءبىراق بۇل قىزمەتكەرلەردىڭ ارەكەتى دۇرىس پا؟ بالاعا ادامگەرشىلىكپەن ءتۇسىندىرىپ، اتا-اناسىنا قوڭىراۋ شالۋعا مۇمكىندىك بەرۋگە بولماي ما؟» — دەپ جازدى اۆتور.
استانا قالالىق پوليسيا دەپارتامەنتى NUR.KZ تىلشىسىنە 17 تامىزدا ءتۇن ورتاسى شاماسىندا ەلوردانىڭ سارىارقا اۋدانىندا ەرەسەكتەردىڭ ەرتىپ ءجۇرۋىنسىز 10 جانە 12 جاستاعى ەكى كامەلەتكە تولماعان انىقتالعانىن ءتۇسىندىردى. «بالالاردىڭ قاۋىپسىزدىگىن قامتاماسىز ەتۋ ماقساتىندا پوليسەيلەر زاڭدا كوزدەلگەن شارالاردى قولداندى: كامەلەتكە تولماعانداردىڭ جەكە باسىن انىقتاۋ، ولاردى پوليسيا بولىمشەسىنە جەتكىزۋ جانە زاڭدى وكىلدەرىنە تاپسىرۋ قاجەت بولدى. جەتكىزۋ كەزىندە 12 جاستاعى قىز پوليسيا قىزمەتكەرلەرىنىڭ تالاپتارىنا قارسىلىق كورسەتىپ، جەرگە جاتىپ، جىلاي باستادى. ءدال وسى ءساتتى جانىنان ءوتىپ بارا جاتقان ايەل ۆيدەوعا ءتۇسىرىپ العان. ءبىراق جاريالانعان ءۇزىندى الدىڭعى جاعدايلاردى جانە پوليسيا قىزمەتكەرلەرىنىڭ ارەكەتتەرىنىڭ سەبەپتەرىن كورسەتپەيدى. وقيعا ورنىنا قىزدىڭ اناسى شاقىرتىلدى»، — دەلىنگەن پوليسيا جاۋابىندا.
ەكى بالانىڭ دا اتا-اناسى كامەلەتكە تولماعانداردىڭ تۇنگى ۋاقىتتا زاڭدى وكىلدەرىنىڭ ەرتىپ ءجۇرۋىنسىز تۇرعىن ۇيدەن تىس جەردە بولۋىنا بايلانىستى اكىمشىلىك جاۋاپكەرشىلىككە تارتىلعانى حابارلاندى. «كامەلەتكە تولماعانداردىڭ اتا-انالارى تاراپىنان پوليسيا قىزمەتكەرلەرىنىڭ ارەكەتتەرىنە قاتىستى ەشقانداي ءوتىنىش نەمەسە شاعىم تۇسكەن جوق. ازاماتتاردى وقيعانىڭ بارلىق ءمان-جايىن ەسكەرمەي، بەينەجازبانىڭ جەكەلەگەن ءۇزىندىسى بويىنشا قورىتىندى جاساماۋعا شاقىرامىز. سونداي-اق ىشكى ىستەر ورگاندارى قىزمەتكەرلەرىنىڭ زاڭدى قىزمەتىنە ارالاسۋعا جول بەرىلمەيتىنىن ەسكە سالامىز. مۇنداي تالاپتار ەڭ الدىمەن بالالاردىڭ ءوزىن قورعاۋ ءۇشىن قويىلعان»، — دەپ قوستى پوليسيا.
قۇقىق قورعاۋ ورگاندارى بيىلعى جىلدىڭ باسىنان بەرى 200-دەن استام كامەلەتكە تولماعان قىلمىستىڭ قۇربانى بولعانىن، 400-دەن استامى جول-كولىك وقيعالارىندا زارداپ شەككەنىن دە حابارلادى. «بۇل ساندار بالالاردى، اسىرەسە تۇنگى ۋاقىتتا، قاراۋسىز قالدىرماۋدىڭ قانشالىقتى ماڭىزدى ەكەنىن تاعى ءبىر رەت كورسەتەدى. وسى كەزەڭدە پوليسيا كامەلەتكە تولماعانداردىڭ زاڭدى وكىلدەرىنىڭ ەرتىپ ءجۇرۋىنسىز تۇنگى ۋاقىتتا بولۋىنىڭ 7 مىڭنان استام فاكتىسىن انىقتادى. سوندىقتان تۇندە بالانى ەرەسەكتەرسىز انىقتاعان كەزدە پوليسيا زاڭدا كوزدەلگەن شارالاردى قولدانۋعا، ونىڭ جەكە باسىن انىقتاۋعا، اتا-اناسىمەن بايلانىسۋعا جانە ونىڭ قاۋىپسىزدىگىن قامتاماسىز ەتۋگە مىندەتتى»، — دەدى دپ-دا.