استانا پوليسياسى 29 شىلدە مەن 9 تامىز ارالىعىندا ەلوردادا وتەتىن «بولاشاق ويىندارى-2026» حالىقارالىق تۋرنيرىنە بايلانىستى كۇشەيتىلگەن رەجيمگە كوشەدى، دەپ حابارلايدى infohub.kz.
استانا پوليسيا دەپارتامەنتىنىڭ مالىمەتىنشە، 29 شىلدە مەن 9 تامىز ارالىعىندا ەلوردادا «بولاشاق ويىندارى-2026» حالىقارالىق ءتۋرنيرى وتەدى. سيفرلىق تەحنولوگيالار مەن ءداستۇرلى سپورت تۇرلەرىن بىرىكتىرەتىن بىرەگەي شاراعا قازاقستان استاناسىنا الەمنىڭ ۇزدىك سپورتشىلارى، حالىقارالىق دەلەگاسيالار، جانكۇيەرلەر مەن تۋريستەر كەلەدى دەپ كۇتىلۋدە.
وسىعان بايلانىستى استانا پوليسيا دەپارتامەنتى كۇشەيتىلگەن رەجيمگە كوشەدى. «حالىقارالىق ءىس-شارا وتەتىن بۇكىل كەزەڭدە پوليسيا قىزمەتكەرلەرى قوعامدىق ءتارتىپتى ساقتاۋ، ازاماتتاردىڭ قاۋىپسىزدىگىن قامتاماسىز ەتۋ جانە قۇقىق بۇزۋشىلىقتاردىڭ الدىن الۋ ءۇشىن تاۋلىك بويى كۇشەيتىلگەن رەجيمدە جۇمىس ىستەيدى»، دەلىنگەن پوليسيا حابارلاماسىندا.
سونىمەن قاتار، جول قوزعالىسى قاۋىپسىزدىگىن قامتاماسىز ەتۋگە ەرەكشە كوڭىل بولىنەدى. جارىس وتەتىن ورىنداردىڭ ماڭىنداعى قوزعالىس رەتتەلەدى. كەپتەلىستەردى بولدىرماۋ، ارنايى تەحنيكانىڭ كەدەرگىسىز ءجۇرۋىن قامتاماسىز ەتۋ جانە جاياۋ جۇرگىنشىلەردىڭ قاۋىپسىزدىگىن ساقتاۋ ءۇشىن كەشەندى شارالار قابىلدانادى. كەيبىر كوشەلەردە قوزعالىسقا ۋاقىتشا شەكتەۋلەر ەنگىزىلۋى مۇمكىن.
قالا تۇرعىندارى مەن قوناقتارى قوعامدىق ءتارتىپتى ساقتاۋعا، قاۋىپسىزدىك تالاپتارىن قاتاڭ ۇستانۋعا جانە پوليسيا قىزمەتكەرلەرىنىڭ زاڭدى تالاپتارىن تۇسىنىستىكپەن قابىلداۋعا شاقىرىلدى.