قىركۇيەك ايىندا استانادا ايگىلى فرانسۋز كلۋبى «پاري سەن-جەرمەننىڭ» (PSG) رەسمي بالالار اكادەمياسى جۇمىسىن باستايدى. قازاقستان PSG Academy حالىقارالىق جەلىسىنە قوسىلعان 24ء-شى ەل بولدى، دەپ حابارلايدى infohub.kz سايتى.
اكادەميانىڭ العاشقى وقۋ-جاتتىعۋ ورتالىعى ەلورداداعى Air Arena سپورت كەشەنىندە ورنالاسادى. فيفا ستاندارتىنا ساي تولىق ولشەمدى الاڭى بار جابىق كەشەن جاس سپورتشىلارعا اۋا رايىنا قاراماستان جىل بويى جاتتىعۋعا مۇمكىندىك بەرەدى.
العاشقى ماۋسىمدا اكادەميا 6 بەن 14 جاس ارالىعىنداعى 300-گە جۋىق بالانى قابىلداۋدى جوسپارلاپ وتىر. بالالار جاسى مەن دايىندىق دەڭگەيىنە قاراي توپتارعا بولىنەدى، ال وقۋ پروسەسى پاريجدىك كلۋبتىڭ رەسمي ادىستەمەسى بويىنشا جۇرگىزىلەدى.
PSG Academy Kazakhstan جوباسىنىڭ نەگىزىن قالاۋشى — كاسىپكەر الماز السەنوۆ. ونىڭ ايتۋىنشا، اكادەميانىڭ باستى ماقساتى — الەمدىك دەڭگەيدەگى دايىندىق جۇيەسىن قولجەتىمدى ەتۋ جانە بالالاردىڭ سپورتتىق ءارى تۇلعالىق وسۋىنە جاعداي جاساۋ.
جوبا سونداي-اق بالالار فۋتبولىن دامىتۋعا جانە قازاقستاندىق مامانداردىڭ بىلىكتىلىگىن ارتتىرۋعا كۇشتى سەرپىن بەرەدى. اكادەميانىڭ بارلىق جاتتىقتىرۋشىلارى PSG Academy باعدارلاماسى بويىنشا ارنايى وقۋدان ءوتىپ، پاريجدەگى «پسج» تەحنيكالىق ماماندارىنان تۇراقتى ادىستەمەلىك قولداۋ الادى.
«اكادەميانىڭ باستى ماقساتى — بالالارعا الەمدىك دەڭگەيدەگى دايىندىق جۇيەسىن قولجەتىمدى ەتۋ جانە ولاردىڭ سپورتتىق ءارى تۇلعالىق وسۋىنە جاعداي جاساۋ»، — دەپ اتاپ ءوتتى PSG Academy Kazakhstan نەگىزىن قالاۋشى الماز السەنوۆ.
استانا تەك باستاپقى نۇكتە بولادى: بولاشاقتا فرانشيزانى قازاقستاننىڭ باسقا وڭىرلەرىنە دە كەڭەيتۋ جوسپارلانۋدا.
2005 جىلى قۇرىلعان PSG Academy بۇگىندە الەمدەگى ەڭ ءىرى فۋتبول جەلىلەرىنىڭ ءبىرى بولىپ تابىلادى. 24 ەلدە 200-دەن استام جاتتىعۋ ورتالىعى جۇمىس ىستەيدى، وندا جىل سايىن 50 مىڭنان استام جاس فۋتبولشى وقيدى.