ەلوردادا QAZBOT كەشەنىنىڭ قۇرىلىسى باستالدى. بۇل ەلدەگى گۋمانويد روبوتتار ءوندىرىسى مەن جاساندى ينتەللەكت سالاسىنداعى شەشىمدەردى ازىرلەۋگە ارنالعان العاشقى الاڭ بولادى. جوبانىڭ العاشقى كەزەڭىنە سالىناتىن ينۆەستيسيا شامامەن 200 ميلليون دوللاردى قۇرايدى، دەپ حابارلايدى infohub.kz.
QAZBOT Technologies كومپانياسىنىڭ مالىمەتىنشە، جاڭا Robotics & AI كەشەنى عىلىمي زەرتتەۋلەردى، ينجەنەرلىك ازىرلەمەلەردى، جەرگىلىكتى ءوندىرىستى جانە روبوتوتەحنيكالىق تەحنولوگيالاردى پراكتيكالىق ەنگىزۋدى بىرىكتىرەدى.
كەشەن اۋماعىندا مەنشىكتى عىلىمي-زەرتتەۋ ورتالىعىن قۇرۋ جوسپارلانۋدا. مۇندا باعدارلامالىق قامتاماسىز ەتۋ مەن جاساندى ينتەللەكت مودەلدەرىن ازىرلەۋ، روبوتوتەحنيكالىق جۇيەلەردى تەستىلەۋ جانە بەيىمدەۋ، سونداي-اق ينجەنەرلىك كادرلاردى دايارلاۋ جۇرگىزىلەدى.
جوبانىڭ ستراتەگيالىق تەحنولوگيالىق سەرىكتەسى — AGIBOT كومپانياسى. قۇرىلىستىڭ باستالۋ سالتاناتىنا قازاقستاننىڭ جاساندى ينتەللەكت جانە سيفرلىق دامۋ مينيسترلىگى مەن استانا اكىمدىگىنىڭ وكىلدەرى دە قاتىستى.
QAZBOT Technologies باس ديرەكتورى ۆلاديسلاۆ سافاروۆتىڭ ايتۋىنشا، جوبا تۇجىرىمداما ساتىسىنان مەنشىكتى تەحنولوگيالىق ينفراقۇرىلىم قۇرۋعا كوشۋدە.
«ءبىزدىڭ مىندەتىمىز — قازاقستاندا زەرتتەۋلەردى، ينجەنەرلىك قۇزىرەتتەردى، ءوندىرىستى جانە شەشىمدەردى ەنگىزۋدى ءبىرتۇتاس جۇيەگە بىرىكتىرۋ. بۇل وزىق تەحنولوگيالاردى بەيىمدەۋگە عانا ەمەس، سونىمەن قاتار مەنشىكتى ازىرلەمەلەردى قالىپتاستىرۋعا جانە ماماندار دايارلاۋعا مۇمكىندىك بەرەدى»، — دەدى سافاروۆ.
QAZBOT-تىڭ نەگىزگى باعىتتارىنىڭ ءبىرى — روبوتوتەحنيكا مەن جاساندى ينتەللەكتكە نەگىزدەلگەن شەشىمدەردى ەكونوميكاعا تىكەلەي ەنگىزۋ.
قولدانۋدىڭ الەۋەتتى باعىتتارى رەتىندە ونەركاسىپ، لوگيستيكا، قارجى سەكتورى، مەديسينا، ءبىلىم بەرۋ، الەۋمەتتىك سالا جانە قىزمەت كورسەتۋ اتالادى.
جوبا تەك روبوتتاردى قۇراستىرۋدى عانا ەمەس. ءبىر الاڭدا زەرتتەۋلەر مەن باعدارلامالىق قامتاماسىز ەتۋدى ازىرلەۋدەن باستاپ وندىرىسكە، تەستىلەۋگە جانە شەشىمدەردى كەيىننەن ەنگىزۋگە دەيىنگى تولىق تەحنولوگيالىق سيكلدى قالىپتاستىرۋ جوسپارلانۋدا.