قازاقستان استاناسىندا ازىق-ت ۇلىكتى روبوت-كۋرەرلەر ارقىلى تەگىن جەتكىزۋ بويىنشا پيلوتتىق جوبا باستالدى. ازىرگە قىزمەت تەك ەسىل جانە نۇرا اۋداندارىنىڭ تۇرعىندارىنا قولجەتىمدى، دەپ حابارلايدى infohub.kz سايتى.
جوبانى استانا اكىمدىگى پوليسيا دەپارتامەنتىمەن، «Astana Innovations» اق جانە Yandex Qazaqstan كومپانياسىمەن بىرلەسىپ، سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنىڭ قولداۋىمەن جۇزەگە اسىرۋدا.
قىزمەتتى پايدالانۋ ءۇشىن Yandex Go قوسىمشاسىن اشىپ، «لاۆكا» بولىمىنە ءوتىپ، تاپسىرىس بەرۋ كەرەك. ەگەر جەتكىزۋ مەكەنجايى پيلوتتىق جوبا ايماعىنا كىرسە، پايدالانۋشى كادىمگى كۋرەردى نەمەسە روبوت-جەتكىزۋشىنى تاڭداي الادى. روبوتپەن جەتكىزۋ ءۇشىن قوسىمشا اقى الىنبايدى.
«روبوت ۇيگە جاياۋ جۇرگىنشىلەر جولىمەن بارادى جانە كىرەبەرىس تۇسىنداعى تروتۋاردا نەمەسە جاقىن جەردەگى قولجەتىمدى نۇكتەدە توقتايدى. پايدالانۋشى ونىڭ قوزعالىسىن قوسىمشادان باقىلاي الادى، ال كەلگەننەن كەيىن سمارتفون ارقىلى جۇك سالعىشىن اشىپ، تاپسىرىسىن الادى»، — دەپ ءتۇسىندىردى اكىمدىكتە.
روبوتتار مارشرۋتتى ءوز بەتىنشە سالادى جانە ناۆيگاسيا جۇيەلەرى، كومپيۋتەرلىك كورۋ جانە زاتتاردى تانۋ كومەگىمەن اينالاداعى جاعدايدى تالدايدى. ولار كەدەرگىلەردى اينالىپ وتەدى، جاياۋ جۇرگىنشىلەردى وتكىزەدى، جىلدامدىقتى باسەڭدەتەدى جانە قاجەت بولعاندا توقتايدى. ورتاشا جىلدامدىعى ساعاتىنا شامامەن 6 كم، ال كونسترۋكسياسى ءارتۇرلى اۋا رايى جاعدايىندا جۇمىس ىستەۋگە مۇمكىندىك بەرەدى.
بۇعان دەيىن «كۋرسيۆ» استانادا العاشقى اەروتاكسيدىڭ دەمونستراسيالىق ۇشۋى وتكەنىن حابارلاعان بولاتىن.