استانالىق سپورتشىلار 2026 جىلدىڭ العاشقى التى ايىندا ءتۇرلى دەڭگەيدەگى 668 جارىسقا قاتىسىپ، بارلىعى 2712 مەدال جەڭىپ الدى. ونىڭ ىشىندە 1069 التىن، 844 كۇمىس جانە 799 قولا مەدال بار، دەپ حابارلايدى infohub.kz سايتى.
كاسىبي سپورتپەن قاتار قالادا اي سايىن اقشالاي قاراجات الاتىن 376 پەرسپەكتيۆالى سپورتشىعا قولداۋ كورسەتىلۋدە.
ءبىرىنشى جارتىجىلدىق ازيا جانە الەم چەمپيوناتتارىنداعى جارقىن جەڭىستەرىمەن ەرەكشەلەندى. ۇلان-باتىردا وتكەن بوكستان قۇرلىق چەمپيوناتىندا نۇربەك پەن ايبەك ورالباي التىن مەدال جەڭىپ السا، تاشكەنتتەگى جاسوسپىرىمدەر تۋرنيرىندە نۇريسلام باكتۋبايەۆ پەن سابىرجان ساعىم كوزگە ءتۇستى. بالۋاندار ريزابەك ايتمۇحان مەن ايبەك ايتبەكوۆ، سونداي-اق مەرگەندەر، ەسكەكشىلەر، گيمناستتار مەن ۆەلوسيپەدشىلەر دە جوعارى ناگرادالار ءۇشىن كۇرەسكە ءساتتى قوسىلدى. الەمدىك دەڭگەيدە قازاقستاندىق تاەكۆوندوشىلار مەن مۋايتاي شەبەرلەرى دە تاريحي ناتيجە كورسەتىپ، كوپتەگەن مەدال جەڭىپ الدى.
ەكىنشى جارتىجىلدىقتا سپورتشىلاردى جاڭا اۋقىمدى سىناقتار كۇتىپ تۇر. 31 تامىز بەن 6 قىركۇيەك ارالىعىندا قىرعىزستاندا VI دۇنيەجۇزىلىك كوشپەندىلەر ويىندارى وتەدى، وندا استانا اتىنان ءۇش باعىت بويىنشا التى سپورتشى قاتىسادى. سونىمەن قاتار، جەتەكشى سپورتشىلار جاپونيادا وتەتىن 2026 جىلعى جازعى ازيا جانە پاراازيا ويىندارىنا دايىندالۋدا، سونداي-اق قازاقستان رەسپۋبليكاسىنىڭ سۋردليمپيادالىق سپورت تۇرلەرىنەن ءوتىپ جاتقان IV سپارتاكياداسىندا كۇرەسىن جالعاستىرۋدا.