استانادا تۇنگى ۋاقىتتا شۋلى جارىس ۇيىمداستىرعان 20 جاستاعى ەكى BMW جۇرگىزۋشىسى 10 تاۋلىككە قاماۋعا الىندى. ولاردىڭ ءبىرى كولىگىن زاڭسىز قايتا جابدىقتاعان، دەپ حابارلايدى infohub.kz.
استانا قالالىق پوليسيا دەپارتامەنتىنىڭ ءباسپاسوز قىزمەتىنىڭ مالىمەتىنشە، جاس جىگىتتەر تۇنگى ۋاقىتتا قالا كوشەلەرىندە مانەۆر جاساۋ ەرەجەلەرىن بۇزىپ، جۇرگەن. سونىمەن قاتار، ولاردىڭ ءبىرى ءوز كولىگىنىڭ شىعارۋ جۇيەسىنىڭ قۇرىلىمىنا وزگەرىستەر ەنگىزگەن.
«قوزعالتقىشتىڭ قاتتى گۋىلى تۇنگى ۋاقىتتا تىنىشتىقتى بۇزىپ، قوعامدىق ءتارتىپتى بۇزدى، بۇل ەلوردا تۇرعىندارىنىڭ الاڭداۋشىلىعىن تۋدىردى»، — دەپ اتاپ ءوتتى پوليسيادا.
جۇرگىزۋشىلەرگە قاتىستى كولىك قۇرالىن زاڭسىز قايتا جابدىقتاۋ جانە مانەۆر جاساۋ ەرەجەلەرىن بۇزۋ بويىنشا اكىمشىلىك ءىس قوزعالدى. كولىكتەر كوممۋنالدىق تۇراققا قويىلدى.
سونىمەن قاتار، قوعامدىق ءتارتىپتى بۇزعانى ءۇشىن جاس جىگىتتەر ۇساق بۇزاقىلىق جاساعانى ءۇشىن جاۋاپكەرشىلىككە تارتىلدى. سوت شەشىمىمەن ولاردىڭ ءارقايسىسىنا 10 تاۋلىككە قاماۋ جازاسى تاعايىندالدى.