انتاليا – استانا رەيسىنىڭ جولاۋشىسى بورتىنداعى اگرەسسيۆتى مىنەز-قۇلقى جانە پوليسياعا باعىنباعانى ءۇشىن 10 تاۋلىككە اكىمشىلىك قاماۋعا الىندى، دەپ حابارلايدى infohub.kz سايتى.
وقيعا ۇشۋ ءالى اياقتالماي جاتىپ بولعان: 44 جاستاعى ەلوردا تۇرعىنى ماساڭ كۇيدە اگرەسسيۆتى مىنەز كورسەتىپ، بالاعات سوزدەر ايتىپ، باسقا جولاۋشىلارعا كەدەرگى كەلتىرە باستاعان. ۇشاق استانا اۋەجايىنا قونعان سوڭ، بۇزاقىنى كولىك پوليسياسى قىزمەتكەرلەرىنە تاپسىرعان.
الايدا جەردە دە جاعداي جالعاستى. Polisia.kz ءىىم مەدياپورتالىنىڭ مالىمەتىنشە، ەر ادام پوليسيا بولمەسىنە جەتكىزىلگەن كەزدە زاڭدى تالاپتاردى ورىنداۋدان باس تارتىپ، باعىنباعان. ناتيجەسىندە پوليسەيلەر ارنايى قۇرال – قول كىسەنىن قولدانۋعا ءماجبۇر بولعان.
تەكسەرۋ قورىتىندىسى بويىنشا ەر ادام الكوگولدىك ىشىمدىكتەر ءىشۋ نەمەسە قوعامدىق ورىنداردا ماساڭ كۇيدە ءجۇرۋ فاكتىسى بويىنشا جاۋاپكەرشىلىككە تارتىلدى. سونىمەن قاتار، ۇساق بۇزاقىلىق جانە قۇقىق قورعاۋ ورگانى قىزمەتكەرىنىڭ زاڭدى وكىمىنە باعىنباۋ فاكتىلەرى بويىنشا ماتەريالدار سوتقا جىبەرىلدى. سوت ونى كىنالى دەپ تانىپ، 10 تاۋلىككە قاماۋ جازاسىن تاعايىندادى.
كولىكتەگى پوليسيا دەپارتامەنتى اۋە كەمەسىنىڭ بورتىندا ءتارتىپتى ساقتاۋ – ەڭ الدىمەن بارلىق جولاۋشىلار مەن ەكيپاجدىڭ قاۋىپسىزدىگى ماسەلەسى ەكەنىن ەسكە سالادى.