قازاقستان استاناسىندا ەل تاريحىندا تۇڭعىش رەت EH216-S ۇشقىشسىز اۋە كەمەسى جولاۋشىمەن ۇشۋ جاسادى، دەپ حابارلايدى infohub.kz سايتى.
ازاماتتىق اۆياسيا كوميتەتىنىڭ مالىمەتىنشە، تىك ۇشۋ مەن قونۋعا قابىلەتتى سەريالىق ەلەكترلىك اۋە اپپاراتى (eVTOL) «بولاشاق ويىندارى 2026» حالىقارالىق ءتۋرنيرى اياسىندا استانانىڭ ارنايى رۇقسات ەتىلگەن اۋماعىندا جولاۋشىمەن دەمونستراسيالىق ۇشۋ جاسادى.
بورت ەكى جولاۋشىعا ارنالعان، ساعاتىنا 130 كم-گە دەيىن جىلدامدىققا جەتە الادى جانە 35 كم-گە دەيىنگى قاشىقتىققا ۇشۋعا قابىلەتتى. «ءبىرىنشى كەزەڭدە قازاقستاننىڭ تابيعي، مادەني جانە تاريحي كورىكتى جەرلەرىنىڭ ۇستىنەن 5-تەن 30 مينۋتقا دەيىنگى دەمونستراسيالىق جانە تۋريستىك باعىتتاردى ۇيىمداستىرۋ قاراستىرىلۋدا. بولاشاقتا ۇشقىشسىز جولاۋشىلار اۋە جۇيەلەرى ەلدىڭ زاماناۋي كولىك ينفراقۇرىلىمىنىڭ بولىگىنە اينالىپ، قولدانىستاعى موبيلدىلىك تۇرلەرىن تولىقتىرا الادى»، — دەدى كوميتەتتە.
كوميتەتتىڭ دەرەگىنشە، ۇشقىشسىز اۋە جۇيەلەرى شۇعىل مەديسينالىق كومەك كورسەتۋ، دارى-دارمەك جەتكىزۋ، ءورت ءسوندىرۋ، لوگيستيكا جانە جىلدامدىق پەن جەدەلدىك ماڭىزدى باسقا دا باعىتتاردا قولدانىلۋى مۇمكىن.
«جەكە باعىت — وتاندىق ءوندىرىستى دامىتۋ. حالىقارالىق ارىپتەستىك اياسىندا قازاقستاندا جولاۋشىلارعا ارنالعان ۇشقىشسىز اۋە جۇيەلەرىنىڭ ءوندىرىسىن لوكاليزاسيالاۋ جوسپارلانۋدا. بۇل جوعارى تەحنولوگيالىق ماشينا جاساۋدا جاڭا قۇزىرەتتەردى قالىپتاستىرۋعا، قوسىمشا جۇمىس ورىندارىن اشۋعا جانە ونەركاسىپتىك كووپەراسيانى كەڭەيتۋگە مۇمكىندىك بەرەدى»، — دەپ قوستى كوميتەتتە.
حابارلامادا سونداي-اق قازاقستاندا eVTOL اۋە كەمەلەرىن پايدالانۋدى، ۆەرتيپورتتاردىڭ قىزمەتىن جانە ۇشقىشسىز اۋە قوزعالىسىن باسقارۋ جۇيەلەرىن رەتتەيتىن زاڭنامالىق وزگەرىستەر قابىلدانعانى ايتىلعان. بۇعان دەيىن پرەمەر-مينيستردىڭ ورىنباسارى قانات بوزىمبايەۆ ۇكىمەتتەگى ءباسپاسوز ءماسليحاتىندا اەروتاكسيمەن ءجۇرۋ قانشا تۇراتىنىن ايتقان ەدى. ونىڭ ايتۋىنشا، دروندارداعى ۇشۋلار ۋاقىت وتە قولجەتىمدى بولادى.
بۇعان دەيىن AutoFlight Prosperity تىك ۇشۋ مەن قونۋعا قابىلەتتى ەلەكترلىك اۋە كەمەسى (eVTOL) ساعاتىنا 200 كم-گە دەيىن جىلدامدىققا جەتە الاتىنى جانە 200 كم-گە دەيىنگى قاشىقتىقتى ەڭسەرە الاتىنى حابارلانعان.