اتىراۋدا سوت Toyota Alphard كولىگىنىڭ جۇرگىزۋشىسىن ءتورت جاسار بالانى قاعىپ كەتكەنى ءۇشىن ءبىر جىلعا باس بوستاندىعىنان ايىرۋعا سوتتادى، الايدا امنيستيا بويىنشا ونى جازاسىن وتەۋدەن بوساتتى، دەپ حابارلايدى infohub.kz سايتى.
جول-كولىك وقيعاسى 4 مامىر كۇنى كەشكە اۆانگارد-2 شاعىن اۋدانىنداعى №3 ءۇيدىڭ اۋلاسىندا بولعان. مينيۆەننىڭ استىنا ۆەلوسيپەدپەن كەلە جاتقان بالا ىلىنگەن. سوققى سالدارىنان بالا اۋىر جاراقات الىپ، ءبىر ايعا جۋىق كومادا جاتقان. اكەسىنىڭ ايتۋىنشا، بالا ەسىن جيعانمەن، ءالى كۇنگە دەيىن ەمدەلىپ، وڭالتۋدان وتۋدە. ول كورۋ قابىلەتىنەن ايىرىلعان، قولىن تولىق قيمىلداتا المايدى جانە تاعى دا وتا جاساتۋ قاجەت.
جۇرگىزۋشى كىناسىن تولىق مويىندادى. ونىڭ تۇسىندىرۋىنشە، ول اۋلاعا كىرىپ كەلە جاتقاندا بالا كەنەتتەن كولىكتىڭ الدىنا شىعىپ كەتكەن. وقيعادان كەيىن ول بالانىڭ اتا-اناسىمەن بىرگە زارداپ شەككەن بالانى بالالار اۋرۋحاناسىنا جەتكىزگەن. الايدا اۆتوتەحنيكالىق ساراپتاما جول-كولىك وقيعاسىن بولدىرماۋعا بولاتىنىن انىقتادى. ساراپشىلاردىڭ قورىتىندىسى بويىنشا، ۋاقىتىلى شۇعىل تەجەۋ جاسالعاندا «تويوتا» بالا پايدا بولعان جەرگە دەيىن توقتاپ ۇلگەرەر ەدى.
سوت جۇرگىزۋشىنى جول ءجۇرىسى ەرەجەلەرىن بۇزىپ، دەنساۋلىققا اۋىر زيان كەلتىرگەنى ءۇشىن كىنالى دەپ تانىدى. ەر ادامعا ءبىر جىل باس بوستاندىعىنان ايىرۋ، ءۇش جىلعا جۇرگىزۋشى كۋالىگىنەن ايىرۋ جانە بالانىڭ اكەسىنە 10 ميلليون تەڭگە مورالدىق وتەماقى تولەۋ جازاسى تاعايىندالدى. سونىمەن قاتار، سوتتالۋشى قازاقستان كونستيتۋسياسىنىڭ 30 جىلدىعىنا وراي جاريالانعان امنيستيا بويىنشا جازادان بوساتىلدى. الايدا جۇرگىزۋشى كۋالىگىنەن ايىرۋ جانە زارداپ شەككەن تاراپقا وتەماقى تولەۋ مىندەتى كۇشىندە قالدى.
بۇعان دەيىن كوكشەتاۋدا جاياۋ جۇرگىنشىنى قاعىپ ولتىرگەن ايەلگە 2،5 جىل باس بوستاندىعىنان ايىرۋ جازاسى كەسىلىپ، ونى وتەۋ مەرزىمى كەيىنگە شەگەرىلگەنى حابارلانعان.