اتىراۋدا كامەلەتكە تولماعاندار ءىسى جونىندەگى پوليسيا ينسپەكتورى تۇرعىن ءۇيدىڭ جانىنداعى ءورتتى بايقاپ، ادامداردى جەدەل ەۆاكۋاسيالاپ، ىقتيمال قايعىلى وقيعانىڭ الدىن الدى، دەپ حابارلايدى infohub.kz سايتى.
وقيعا م. اتەمىس ۇلى كوشەسىندەگى ءۇيدىڭ اۋلاسىندا بولدى. وندا ەلەكتر جەلىسىنە ءتيىپ تۇرعان اعاش بۇتاقتارى ورتەنىپ كەتكەن. اتىراۋ قالالىق پوليسيا باسقارماسىنىڭ كامەلەتكە تولماعاندار ءىسى جونىندەگى ينسپەكتورى ماكسيم دوسكالييەۆ جانىنان ءوتىپ بارا جاتىپ، ءقاۋىپتى بىردەن باعالادى.
«ق ر ءىىم جاڭالىقتارى» Telegram-ارناسىندا حابارلانعانداي، پوليسەي بىردەن ۇيگە كىرىپ، ادامداردى كوشەگە شىعاردى. تۇرعىنداردى ءقاۋىپسىز جەرگە ەۆاكۋاسيالاعان سوڭ، ماكسيم دوسكالييەۆ ءورت ءسوندىرۋ قىزمەتىن شاقىردى جانە ماماندار كەلگەنشە احۋالدى باقىلاپ، ادامداردى ءقاۋىپتى ايماققا جىبەرمەدى.
«پوليسەيدىڭ سەرگەكتىگى مەن ۋاقىتىندا قابىلدانعان شەشىمنىڭ ارقاسىندا تۇرعىندار ءقاۋىپسىز جەرگە ەۆاكۋاسيالاندى، بۇل ىقتيمال سالداردىڭ الدىن الۋعا مۇمكىندىك بەردى»، — دەلىنگەن ءىىم حابارلاماسىندا.
ۆەدومستۆو سونداي-اق ينسپەكتور ءورت سوندىرۋشىلەر كەلگەنگە دەيىن وقيعا ورنىندا قاۋىپسىزدىكتى قامتاماسىز ەتىپ، ادامداردى ءقاۋىپتى ايماققا جىبەرمەگەنىن اتاپ ءوتتى.