اتىراۋدا «استراحان – ماڭعىستاۋ» ماگيسترالدىق سۋ قۇبىرىن قايتا جاڭارتۋ كەزىندە اسا ءىرى كولەمدە الاياقتىق جاساعانى ءۇشىن سوت ۇكىم شىعاردى. بەس ايىپتالۋشى كىنالى دەپ تانىلدى، دەپ حابارلايدى infohub.kz.
اتىراۋ قالاسىنىڭ №2 سوتى انىقتاعانداي، سحەماعا «كازترانسويل» كومپانياسىنىڭ «ماگيسترالدىق سۋ قۇبىرى» ەنشىلەس كاسىپورنىنىڭ بۇرىنعى باسشىسى، ونىڭ ورىنباسارى، مەردىگەر قۇرىلىس ۇيىمىنىڭ وكىلدەرى جانە جوبالىق فيرمانىڭ قۇرىلتايشىسى قاتىسقان.
انىقتالعانداي، ايىپتالۋشىلاردىڭ ءبىرى قىزمەتتىك جاعدايىن پايدالانىپ، مەردىگەردى ءىس جۇزىندە باقىلاي وتىرىپ، باسقا قاتىسۋشىلارمەن بىرگە سۋ قۇبىرىن قايتا جاڭارتۋ جوباسىن زاڭسىز تۇزەتكەن، اتاپ ايتقاندا قۇبىر ءتۇرىن وزگەرتكەن. بۇل رەتتە جوبالىق-سمەتالىق قۇجاتتامادا ماتەريالداردىڭ قۇنى اسىرا كورسەتىلگەن، ال ءىس جۇزىندە قۇبىرلار الدەقايدا ارزانعا ساتىپ الىنعان. وسىلايشا، ينفراقۇرىلىمدىق جوباعا بولىنگەن قاراجات زاڭسىز شىعارىلعان.
سوتتالۋشىلار كىناسىن مويىنداماي، اقتاۋدى سۇرادى. الايدا سوت ولاردىڭ كىناسىن كۋاگەرلەردىڭ ايعاقتارىمەن، جاسىرىن تەرگەۋ ارەكەتتەرىنىڭ ماتەريالدارىمەن، حات-حابارلارمەن، سونداي-اق ماماندار مەن ساراپشىلاردىڭ قورىتىندىلارىمەن دالەلدەندى دەپ سانادى.
سوت ۇكىمىمەن ايىپتالۋشىلار: س. قك 28-بابى 3-بولىگى، 190-بابى 4-بولىگى 2-تارماعى بويىنشا – 6 جىل 8 ايعا باس بوستاندىعىنان ايىرۋعا؛ ك. قك 190-بابى 4-بولىگى 2-تارماعى بويىنشا – 6 جىلعا باس بوستاندىعىنان ايىرۋعا؛ م.، ي. قك 190-بابى 4-بولىگى 2-تارماعى بويىنشا – 6 جىلعا باس بوستاندىعىنان ايىرۋعا؛ ا. قك 28-بابى 5-بولىگى، 190-بابى 4-بولىگى 2-تارماعى بويىنشا – 5 جىلعا باس بوستاندىعىنان ايىرۋعا سوتتالدى. ولارعا ءارتۇرلى مەرزىمگە باسشىلىق لاۋازىمداردى اتقارۋعا جانە مەملەكەتتىك قىزمەتتە جۇمىس ىستەۋگە تىيىم سالىندى. ۇكىم ءالى زاڭدى كۇشىنە ەنگەن جوق.
بۇعان دەيىن باس پروكۋراتۋرا سۋ قۇبىرىن قايتا جاڭارتۋدىڭ جالپى قۇنى 17 ملرد تەڭگەدەن اسقانىن حابارلاعان. تەرگەۋ اياسىندا ايىپتالۋشىلاردىڭ مۇلكى تەكسەرىلدى: شامامەن 1،1 ملرد تەڭگەگە اكتيۆتەر انىقتالدى، ونىڭ ءبىر بولىگىن سوت مەملەكەت كىرىسىنە تاركىلەدى. سوت مەملەكەتكە 6،4 ملرد تەڭگە كولەمىندەگى زالالدى وتەۋ تۋرالى تالاپتى قاناعاتتاندىردى. 12 ملن تەڭگەگە قوسىمشا تالاپ قاناعاتتاندىرىلماي قالدى، ويتكەنى زالالدىڭ بۇل بولىگى دالەلدەنبەگەن.