اتىراۋ قالالىق اكىمدىگىنە قاراستى تومارلى اۋىلىندا وتباسىلىق جانجال پىشاقتاۋمەن اياقتالدى. 56 جاستاعى ەر ادام ۇلىنىڭ دەنساۋلىعىنا اۋىر زيان كەلتىردى دەگەن ايىپپەن سوت الدىنا كەلدى، دەپ حابارلايدى infohub.kz سايتى.
ءىس قۇجاتتارىنا سايكەس، 11 ءساۋىر كۇنى كەشكە اكە مەن بالا بىرگە الكوگول ءىشىپ، كەيىن ولاردىڭ اراسىندا جانجال شىققان. تەرگەۋ نۇسقاسى بويىنشا، ۇلى ۇيىقتاپ جاتقان اكەسىنە الدىمەن ءوزى شابۋىل جاساپ، ونى تۇنشىقتىرا باستاعان. ەر ادام بوسانىپ شىعىپ، اس ۇيدەن پىشاق الىپ، ۇلىنا بىرنەشە رەت سوققى جاساعان.
سوت-مەديسينالىق ساراپتاما جابىرلەنۋشىنىڭ ىشىنە ءبىر، ارقاسىنا بەس پىشاق جاراقاتىن العانىن، باۋىر، ىشەك جانە قابىرعالارى زاقىمدانعانىن انىقتادى. بۇل جاراقاتتار دەنساۋلىققا اۋىر زيان رەتىندە باعالاندى.
سوتتا ايىپتالۋشى كىناسىن تولىق مويىنداپ، وقيعادان كەيىن ۇلىمەن تاتۋلاسقانىن ايتىپ، ونى باس بوستاندىعىنان ايىرماۋدى سۇرادى. جابىرلەنۋشى جانجالدى العاشقى بولىپ باستاعانىن راستاپ، اكەسىنە جەڭىل جازا تاعايىنداۋدى ءوتىندى.
ۇكىم شىعارۋ كەزىندە سوت ايىپتالۋشىنىڭ وكىنۋىن، تاراپتاردىڭ تاتۋلاسۋىن جانە جانجالعا جابىرلەنۋشىنىڭ زاڭسىز ارەكەتتەرى سەبەپ بولعانىن ەسكەردى. اۋىرلاتاتىن ءمان-جاي رەتىندە الكوگولدىك ماساڭ كۇي تانىلدى.
ناتيجەسىندە ەر ادام ءۇش جىلعا باس بوستاندىعىنان ايىرۋ جازاسىنا شارتتى تۇردە، پروباسيالىق باقىلاۋمەن سوتتالدى. ۇكىم جاريالانعاننان كەيىن ول سوت زالىنان بوساتىلدى.