اتىراۋ وبلىسىندا 42 جاستاعى ايەلدىڭ ولىمىنە قاتىستى قىلمىستىق ءىس تەرگەلۋدە. كۇدىكتى — ونىڭ ازاماتتىق كۇيەۋى. قايعىلى وقيعا قايتىس بولعان ايەلدىڭ ءۇش جاسار قىزىنىڭ كوز الدىندا بولعان. كەيىن قىز بولعان جاعدايدى پوليسياعا ايتىپ بەرگەن، دەپ حابارلايدى infohub.kz.
«كريمينالنىي كازاحستان» Telegram-ارناسىنىڭ مالىمەتىنشە، ايەلدىڭ دەنەسىن ۇيگە قايتقان 16 جاسار قىزى تاۋىپ العان. قايتىس بولعان ايەلدىڭ قاسىندا ونىڭ ءۇش جاسار ءسىڭلىسى بولعان. تۋىستارىنىڭ ايتۋىنشا، قىز پوليسيا قىزمەتكەرلەرىنە اكەسىنىڭ اناسىنا پىشاق جاراقاتىن سالىپ، كەيىن قاشىپ كەتكەنىن كورگەنىن ايتقان. جاقىندارىنىڭ سوزىنشە، ايەلدىڭ دەنەسىنەن 28 پىشاق جاراقاتى تابىلعان. سونداي-اق ولار قايتىس بولعان ايەلدىڭ بۇرىن دا سوجيتەلدىڭ اگرەسسيۆتى مىنەز-قۇلقىنا بايلانىستى پوليسياعا بىرنەشە رەت شاعىمدانعانىن مالىمدەگەن.
اتىراۋ وبلىسى پوليسيا دەپارتامەنتىندە كۇدىكتىنىڭ ۇستالعانىن راستادى. «تۇرمىستىق جانجال كەزىندە ايەلدى ءولتىردى دەگەن كۇدىكپەن 37 جاستاعى ەر ادام ۇستالىپ، ۋاقىتشا ۇستاۋ يزولياتورىنا قامالدى. ول قايتىس بولعان ايەلمەن ازاماتتىق نەكەدە بولعان. وسى فاكتى بويىنشا «ادام ءولتىرۋ» بابى بويىنشا قىلمىستىق ءىس قوزعالدى. قاجەتتى تەرگەۋ ارەكەتتەرىنىڭ كەشەنى جۇرگىزىلۋدە»، — دەپ حابارلادى پوليسيادا. ۆەدومستۆو تەرگەۋ مۇددەسىنە بايلانىستى باسقا اقپارات جاريا ەتىلمەيتىنىن قوستى.
بۇعان دەيىن شىعىس قازاقستان وبلىسىندا التى بالانىڭ اناسى بولعان بۇرىنعى ايەلىنە قاتىگەزدىكپەن شابۋىل جاسادى دەگەن كۇدىكپەن 51 جاستاعى ەر ادام ۇستالعانى حابارلانعان. پوليسيا مالىمەتىنشە، وقيعا 25 شىلدەدە سامار اۋىلىندا بولعان. كۇدىكتىگە قاتىستى قىلمىستىق ءىس قوزعالىپ، ول قاماۋعا الىنعان. شىعىس قازاقستان وبلىسى پوليسيا دەپارتامەنتىندە ەر ادامنىڭ بۇرىن دا جابىرلەنۋشىنىڭ ارىزى بويىنشا بىرنەشە رەت قىلمىستىق جانە اكىمشىلىك جاۋاپكەرشىلىككە تارتىلعانىن جانە اتا-انا قۇقىعىنان ايىرىلعانىن حابارلادى.