الەۋمەتتىك جەلىلەردە اتىراۋداعى تۇرعىن ءۇيدىڭ اۋلاسىندا ەر ادامنىڭ ايەلدى ۇرىپ-سوققان ۆيدەوسى تارالۋدا. وقيعاعا وبلىستىق پوليسيا دەپارتامەنتى تۇسىنىكتەمە بەردى، دەپ حابارلايدى infohub.kz سايتى.
كادرلاردا ەر ادامنىڭ ورىندىقتا وتىرعان ايەلگە جاقىنداپ، بەتىنەن ۇرعانى كورىنەدى. ول تۇرعان كەزدە جۇدىرىعىمەن باسىنان ۇرادى. اتىراۋ وبلىسى پد مالىمەتىنشە، 2026 جىلعى 6 تامىزدا نۇرسايا شاعىن اۋدانىنداعى ءۇيدىڭ اۋلاسىندا جۇبايلار اراسىندا تۇرمىستىق جانجال بولعان. وقيعا ورنىنا كەلگەن پوليسيا قىزمەتكەرلەرى جانجالعا قاتىسۋشىلاردى انىقتاعان.
تەكسەرۋ بارىسىندا 1993 جىلى تۋعان ەر ادامنىڭ زاڭدى نەكەدە تۇرعان 1995 جىلى تۋعان ايەلدى ۇرىپ-سوققانى انىقتالدى. جابىرلەنۋشى شاعىمدانباعانىنا قاراماستان، قۇقىق بۇزۋشىعا قاتىستى قورعاۋ نۇسقاماسى شىعارىلدى. سونداي-اق، تۇرعىلىقتى جەرى بويىنشا ۋاقىتشا تىركەۋدىڭ بولماۋىنا بايلانىستى اقبتك-نىڭ 492-بابىنىڭ 1-بولىگى بويىنشا حاتتاما تولتىرىلدى.
نازار اۋدارىڭىز! ۆيدەودا زورلىق-زومبىلىق كورىنىستەرى بار. روليكتى كامەلەتكە تولماعاندارعا، پسيحيكاسى تۇراقسىز ادامدارعا جانە جۇكتى ايەلدەرگە كورۋ ۇسىنىلمايدى.