اۆستريادا مۇزدىقتىڭ ەرۋىنە بايلانىستى 60 جىل بۇرىن جوعالعان ريۋكزاك 86 جاستاعى الپينيستكە قايتارىلدى. بۇل تۋرالى infohub.kz سايتى حابارلايدى.
وتكەن جىلى شىلدە ايىندا تيرول ايماعىنداعى زۋلستالفەرنەر مۇزدىعىندا، تەڭىز دەڭگەيىنەن 2955 مەتر بيىكتىكتە، ءبىر سەرۋەندەۋشى مۇز اراسىنان مۇز بالتاسى، كامەرا جانە تەمەكى تارتاتىن قۇبىر سياقتى زاتتاردى تاپقان. بۇل زاتتار 1950-1960 جىلدارى قولدانىلعان بولۋى مۇمكىن.
اۆستريا پوليسياسى تەرگەۋ بارىسىندا ريۋكزاك ىشىندەگى توزىعى جەتكەن قۇجاتتار ارقىلى يەسىنىڭ ەسىمىن انىقتاپ، ونى تاۋىپتى. وقيعا 1963 جىلدىڭ تامىز ايىندا بولعان: ەر ادام دوستارىمەن بىرگە مۇزدىقتى كەسىپ ءوتىپ بارا جاتىپ، جارىققا قۇلاعان. توپ ارقانمەن بايلانعاندىقتان، دوستارى ونى سۋىرىپ الا العان. پوليسيانىڭ ايتۋىنشا، سالماعىن جەڭىلدەتۋ ءۇشىن ول ريۋكزاگىن شەشىپ، جارىققا لاقتىرعان.
ءقازىر ەر ادام اۋىرعاندىقتان زاتتاردى ءوزى الا الماي، ولار ۇلى ارقىلى قايتارىلعان. پوليسيا ونىڭ ەسىمىن جاريالامادى.
عالىمداردىڭ پىكىرىنشە، ادام ارەكەتىنەن تۋىنداعان جاھاندىق جىلىنۋ ەۋروپالىق مۇزدىقتاردىڭ جەدەل ەرۋىنە اكەلىپ، سوڭعى ونجىلدىقتاردا كوپتەگەن جادىگەرلەر، كونە ەكوجۇيەلەر مەن ادام قالدىقتارىنىڭ اشىلۋىنا سەبەپ بولدى.
مىسالى، 2015 جىلى ءبىرىنشى دۇنيەجۇزىلىك سوعىس كەزىندە اق سوعىستا يتالياندىق اسكەرلەر پانالاعان كازارما تابىلدى. ال 1991 جىلى نەمىس سەرۋەندەۋشىلەرى ەتسال الپىسىندەگى مۇزدىقتا 5300 جىلدىق مۋميالانعان اڭشىنىڭ دەنەسىن تاپقان بولاتىن. «وتسي» دەپ اتالاتىن بۇل مۋميا ءقازىر بولسانو مۇراجايىندا ساقتاۋلى.