قازاقستاندا اۆتوليزينگ شارتتارى بويىنشا سىياقىنىڭ جىلدىق ءتيىمدى مولشەرلەمەسىنىڭ شەكتى مولشەرى بەلگىلەندى: ەڭ جوعارى كورسەتكىش كولىك قۇنىنا بايلانىستى جانە جىلىنا 46%-عا جەتۋى مۇمكىن، دەپ حابارلايدى infohub.kz سايتى.
ءتيىستى پارامەترلەر قازاقستان رەسپۋبليكاسى ونەركاسىپ جانە قۇرىلىس مينيسترلىگىنىڭ بۇيرىعىمەن بەكىتىلگەن. جەكە تۇلعالارعا ارنالعان اۆتوليزينگ باعدارلاماسى ەلدە 2025 جىلدىڭ سوڭىندا ىسكە قوسىلعان بولاتىن، ەندى كولىكتەردى ليزينگكە بەرەتىن كومپانيالار بەلگىلەي الاتىن شەكتى پايىزدىق مولشەرلەمەلەر بەلگىلى بولدى.
بۇيرىققا سايكەس، سىياقىنىڭ شەكتى جىلدىق ءتيىمدى مولشەرلەمەسى كولىك قۇنىنا قاراي سارالانعان. قۇنى 20 ملن تەڭگەدەن اسپايتىن كولىكتەر ءۇشىن ول جىلىنا 36%-دان اسپاۋى ءتيىس. قۇنى 20 ملن تەڭگەدەن جوعارى اۆتوموبيلدەر ءۇشىن شەكتەۋ جىلىنا 46% قۇرايدى. ال ەگەر ليزينگ بەرۋشى بانك بولسا، شەكتى مولشەرلەمە جىلىنا 35%-بەن شەكتەلگەن.
سىياقى مولشەرلەمەسىنەن بولەك، كليەنت ءۇشىن قورىتىندى سوماعا ءوتىنىمدى قاراۋ كوميسسياسى مەن باستاپقى اۆانستىق تولەم كىرەدى. سونىمەن قاتار، اۆتوموبيلگە قىزمەت كورسەتۋ جانە وزگە دە ىقتيمال شىعىستار تولىعىمەن كليەنتكە جۇكتەلەدى. شارت تالاپتارىن بۇزعانى ءۇشىن ايىپپۇل قاراستىرىلعان.
اۆتوليزينگ مەحانيزمى بىلايشا جۇمىس ىستەيدى: كومپانيا اۆتوموبيل ساتىپ الىپ، ونى كليەنتكە ۋاقىتشا پايدالانۋعا بەرەدى، ازامات كولىك ءۇشىن بەلگىلى ءبىر مەرزىم ىشىندە تولەم جاسايدى، ال شارت اياقتالعاندا اۆتوكولىك يەسىنىڭ ەكى نۇسقاسى بار — كولىكتى ليزينگ بەرۋشىگە قايتارۋ نەمەسە قالدىق قۇنى بويىنشا ساتىپ الۋ.
باستاپقىدا بۇل مەحانيزم اۆتوكرەديتتەرگە ءتيىمدى بالاما بولادى دەپ كۇتىلگەن. الايدا اۆتوليزينگ حالىق اراسىندا تانىمال بولمادى: كوپتەگەن ازاماتتار ءۇشىن ول قالتا كوتەرەتىن شارۋا ەمەس.