2026 جىلدىڭ ءبىرىنشى جارتىجىلدىعى قورىتىندىسى بويىنشا الماتى قازاقستانداعى اۆتوكولىك قۇرالدارىن ءوندىرۋدىڭ ءىرى ورتالىعىنا اينالدى. مۇندا 488،2 ملرد تەڭگەگە ءونىم شىعارىلدى، بۇل رەسپۋبليكالىق جالپى كولەمنىڭ 42،3%-ىن قۇرايدى. قوستاناي وبلىسىمەن (438،7 ملرد تەڭگە، 38%) بىرگە ەكى وڭىرگە اۆتوموبيلدەر، تىركەمەلەر مەن جارتىلاي تىركەمەلەر ءوندىرىسىنىڭ 80%-دان استامى تيەسىلى، دەپ infohub.kz حابارلادى.
ءۇشىنشى ورىندا قاراعاندى وبلىسى – 110،9 ملرد تەڭگە (9،6%). ودان كەيىن اباي (56،3 ملرد تەڭگە) جانە اقمولا (43،2 ملرد تەڭگە) وبلىستارى تۇر. بۇل بەس ءوڭىر بىرىگىپ ەلدەگى اۆتوموبيل ءوندىرىسىنىڭ 98،6%-ىن قامتاماسىز ەتەدى. قالعان ايماقتاردا كولەم ايتارلىقتاي تومەن: استانا – 11،2 ملرد تەڭگە، باتىس قازاقستان – 2،7 ملرد تەڭگە، پاۆلودار – 1،4 ملرد تەڭگە.
اۆتوموبيل ونەركاسىبى كوشباسشى وڭىرلەر ەكونوميكاسىندا ماڭىزدى ءرول اتقارادى. الماتىدا ونىڭ ۇلەسى ماشينا جاساۋدا 82،9%، وڭدەۋ ونەركاسىبىندە 43،9% جانە جالپى ونەركاسىپ وندىرىسىندە 36،4% قۇرادى. قوستاناي وبلىسىندا بۇل كورسەتكىشتەر تيىسىنشە 79،5%، 39% جانە 27،9%. اۆتونەركاسىپ اباي (67،4%)، قاراعاندى (36،4%)، اقمولا (27،7%) جانە باتىس قازاقستان (10،3%) وبلىستارىنىڭ ماشينا جاساۋ سالاسىنا ەلەۋلى ۇلەس قوسادى.
قازاقستاندا جەڭىل جانە جۇك اۆتوموبيلدەرى، اۆتوبۋستار مەن ارنايى تەحنيكا شىعارۋ بويىنشا 11 كاسىپورىن جۇمىس ىستەيدى. 2025 جىلى جالپى ينۆەستيسيا كولەمى 346 ملرد تەڭگەدەن اساتىن Astana Motors Manufacturing Kazakhstan جانە KIA Qazaqstan زاۋىتتارى ىسكە قوسىلدى. ولاردىڭ اۆتوماتتاندىرىلعان جەلىلەرىندە 119 ونەركاسىپتىك روبوت جۇمىس ىستەيدى. جۇك تەحنيكاسى سەگمەنتى دە دامىپ كەلەدى: Scania جانە Howo وندىرىستەرىنەن باسقا، 2026 جىلدىڭ ءتورتىنشى توقسانىنان باستاپ Hyundai Trans Auto الاڭىندا جىلىنا 500 Volvo سەدەلكا تارتقىشىن شىعارۋ جوسپارلانۋدا. Barys Truck Manufactory كومپانياسى XCMG-مەن بىرلەسىپ ەلەكترلى جۇك تارتقىشتار شىعارۋ جوباسىن ىسكە اسىرۋدا.
قازاقستان پرەزيدەنتى قاسىم-جومارت توقاەۆتىڭ قىتايعا مەملەكەتتىك ساپارى بارىسىندا قول جەتكىزىلگەن كەلىسىمدەر قوسىمشا سەرپىن بەرۋى ءتيىس. ولار Li Auto، OMODA جانە JAECOO اۆتوموبيلدەرىن ءوندىرۋدى ۇيىمداستىرۋدى، SITRAK ۇشقىشسىز سەدەلكا تارتقىشتارىن شىعارۋدى، سونداي-اق BYD-مەن بىرلەسىپ جوعارى جىلدامدىقتى زاريادتاۋ ستانسيالارى جەلىسىن دامىتۋدى كوزدەيدى.
ماشينا جاساۋدى دامىتۋ ەكونوميكانى ديۆەرسيفيكاسيالاۋ بويىنشا مەملەكەتتىك ساياساتتىڭ باسىم باعىتى بولىپ قالا بەرەدى. پرەزيدەنت قاسىم-جومارت توقايەۆ زاماناۋي وندىرىستەردى قۇرۋ مەن وزىق تەحنولوگيالاردى، سونىڭ ىشىندە ۇشقىشسىز كولىك پەن ارنايى اۆتوموبيل تەحنيكاسىن ەنگىزۋدىڭ ماڭىزدىلىعىن بىرنەشە رەت اتاپ ءوتتى. جاڭا ينۆەستيسيالىق جوبالار قازاقستاننىڭ ايماقتاعى اۆتوموبيل جاساۋ ورتالىقتارىنىڭ ءبىرى رەتىندەگى پوزيسياسىن نىعايتۋعا باعىتتالعان.