2026 جىلعى ازيا ويىندارىنا قاتىساتىن قازاقستان ايەلدەر بوكس قۇراماسىنىڭ تۇپكىلىكتى قۇرامى بەلگىلى بولدى. بارلىق سپورتشىلاردىڭ جاعدايى تاماشا، جاراقاتتارى جوق، ال باپكەرلەر شتابى كوماندانىڭ ءساتتى ونەر كورسەتۋىنە ۇلكەن ءۇمىت ارتىپ وتىر، دەپ حابارلايدى infohub.kz.
قۇرامانىڭ باس باپكەرى ەلدوس سايدالين ۇلتتىق وليمپيادالىق كوميتەتكە بەرگەن سۇحباتىندا قۇرلىقتىق بىرىنشىلىكتە ەل نامىسىن قورعايتىن سپورتشى قىزداردىڭ ەسىمدەرىن اتادى. 51 كەلىگە دەيىنگى سالماق دارەجەسىندە الۋا بالكيبەكوۆا، 54 كەلىگە دەيىن — نازىم قىزايباي، 60 كەلىگە دەيىن — ۆيكتوريا گرافەەۆا، 65 كەلىگە دەيىن — ايدا ابيكەەۆا، ال 75 كەلىگە دەيىن — ناتاليا بوگدانوۆا ونەر كورسەتەدى.
«قاتىسۋشىلار ءتىزىمىن جاساۋ كەزىندە وتكەن جىلعى الەم چەمپيوناتىنىڭ ناتيجەلەرى، سونداي-اق بيىلعى ماۋسىمداعى الەم كۋبوگى كەزەڭدەرىنىڭ قورىتىندىلارى ەسكەرىلدى»، — دەدى سايدالين.
مامان ايەلدەر بوكسى ازيادا قارقىندى دامىپ كەلە جاتقانىن، ال قازاقستاندىق كوماندانىڭ باستى باسەكەلەستەرى قاتارىندا ءۇندىستان مەن جۇڭگو قۇرامالارىن اتادى.
«ءقازىر ءبىزدىڭ كوماندا اقش-تا وقۋ-جاتتىعۋ جيىنىن وتكىزىپ جاتىر. 4 تامىزدا قازاقستانعا قايتامىز. ودان كەيىن سپورتشىلار جەكە باعدارلاما بويىنشا دايىندالىپ، ازداپ دەمالىپ الادى. كەلەسى جيىن 16 تامىزدا باستالادى. وعان رەسەي مەن اقش قۇرامالارى قاتىسادى. ال 9 قىركۇيەكتە جاپونياعا اتتانامىز، وندا دايىندىقتىڭ قورىتىندى كەزەڭى وتەدى. بەيىمدەلۋدەن ءوتىپ، ويىندارعا دايىندالامىز»، — دەدى باپكەر.
ونىڭ ايتۋىنشا، قازاقستاندىق سپورتشى قىزداردىڭ كوڭىل كۇيى جاقسى، جاراقاتتارى جوق. كوماندا ازيادا-2026-دا ءساتتى ونەر كورسەتۋگە سەنىمدى.