جاپونيادا ءوتىپ جاتقان XX جازعى ازيا ويىندارىنىڭ سوڭعى تولىققاندى مەدال كۇنىندە قازاقستان قۇراماسى قورجىنىن جەتى ءتۇرلى مەدالمەن تولىقتىردى. الايدا جۇما كۇنىنەن وزگەشە، بۇل كۇنى قازاقستاندىق سپورتشىلار التىن مەدال جەڭىپ الا المادى، دەپ حابارلايدى infohub.kz سايتى.
ازيادا-2026-نىڭ ۆيسە-چەمپيوندارى اتانعان ءۇش قازاقستاندىق: 85 كەلىگە دەيىنگى سالماق دارەجەسىندە ونەر كورسەتەتىن دجيۋ-دجيتسۋ شەبەرى مەرەي قابدۋللايەۆ، ارالاس كوماندالىق تۋرنيردەگى دزيۋدوشىلار، سونداي-اق سۋ پولوسىنان ەرلەر قۇراماسى.
ۇلتتىق كوماندا قورجىنىنا قولا مەدالداردى توپتىق كوپسايىستاعى گيمناستشىلار — جاسمين جۇنىسباەۆا، ايدا حاكيمجانوۆا، مادينا مىرزاباي، ايزەرە نۇرماعامبەتوۆا جانە كريستينا چەپۋلسكايا فينالدا ءۇشىنشى ورىن الىپ اكەلدى. ماريان جۋراۆلەۆا 63 كەلىگە دەيىنگى سالماقتا دجيۋ-دجيتسۋدەن قولا جەڭىپ الدى. ءۇشىنشى ساتىعا سونداي-اق ەركىن كۇرەستەن نۇرقوجا قايپانوۆ (74 كگ) جانە ايەلدەر كۇرەسىنەن نيلۋفار رايموۆا (57 كگ) كوتەرىلدى.
رايموۆانىڭ ايەلدەر كۇرەسى قۇراماسىنداعى قۇربىسى شۇعىلا ومىربەك 53 كەلىگە دەيىنگى سالماقتا قولاعا ءبىر قادام جەتپەي قالدى. كوركەم گيمناستيكادان جەكە كوپسايىس فينالىندا ءتورتىنشى ورىندى اقمارال ەرەكەشەۆا يەلەنسە، وسى ديسيپلينادا ايبوتا ەرتاي قىزى بەسىنشى بولدى.
تاەكۆوندوشىلار ساميرحون اباباكيروۆ پەن بەيبارىس قابلان ءوز ونەرلەرىن شيرەك فينال ساتىسىندا اياقتادى. توعجان قازنابەك پەن نازىم ماحمۋتوۆا 1/8 فينال كەزەڭىندە جارىستان شىعىپ قالدى.
قازاقستاننىڭ ايەلدەر رەگبي-7 قۇراماسى قورىتىندى بەسىنشى ورىندى يەلەنسە، ەرلەر كومانداسى ونىنشى ورىندا مارەگە جەتتى. ون ءبىرىنشى ورىندا ازيادانى قازاقستاندىق ۆولەيبولشىلار اياقتادى.
ازيا ويىندارىنىڭ ون ءتورتىنشى كۇنىنەن كەيىن قازاقستان قۇراماسى بەيرەسمي مەدال ەسەبىندە سەگىزىنشى ورىندى ساقتاپ قالدى. جالپى ەسەپتە جوعارى كوتەرىلۋ ەندى مۇمكىن ەمەس، ويتكەنى ويىنداردىڭ سوڭعى كۇنى تەك كونكۋردان عانا جارىس وتەدى.
جاپونياداعى XX جازعى ازيا ويىندارى 19 قىركۇيەكتە رەسمي تۇردە اشىلىپ، 4 قازاندا اياقتالادى. 45 ەلدىڭ سپورتشىلارى قاتىساتىن كەشەندى جارىستاردا 460 مەدال جيىنتىعى ساراپقا سالىنادى: 217 — ەرلەر اراسىندا، 204 — ايەلدەر اراسىندا جانە 39 — ارالاس رازريادتاردا. ازيادا-2026-دا قازاقستان قۇراماسىنىڭ قۇرامىندا 35 سپورت تۇرىنەن 558 سپورتشى ونەر كورسەتەدى.