الماتىدا قايرات ساتىبالدى ۇلىنىڭ ۇلىنا تيەسىلى «بايسات» بازارى ساتىلدى. ساۋدا-ساتتىق بىرنەشە ءساتسىز ارەكەتتەن كەيىن ءساتتى ءوتىپ، مامىلە سوماسى 24 772 753 285 تەڭگەنى قۇرادى، دەپ حابارلايدى infohub.kz سايتى.
ەلەكتروندىق ساۋدا الاڭىنىڭ دەرەكتەرىنە سايكەس، اۋكسيون بۇگىن، 7 تامىزدا، ساعات 12:00-دە ءوتتى. ساۋداعا «كوتەرمە جانە بولشەك ساۋدا ورتالىعى» ءجشس-نىڭ 100% جارعىلىق ۇلەسى قويىلدى. باستاپقى باعا ساتۋدىڭ سوڭعى قۇنىمەن سايكەس كەلدى.
جوبانىڭ سيپاتتاماسىندا كاسىپورىن قىزمەتكەرلەرىنىڭ ورتاشا جىلدىق سانى 64 ادامدى قۇرايتىنى كورسەتىلگەن. ساتۋشى رەتىندە قايتارىلعان اكتيۆتەردى باسقارۋ كومپانياسى شىقتى. ساتىپ الۋشىنىڭ ءاتى-جونى اشىلمايدى.
ايتا كەتۋ كەرەك، «بايسات» ءبىرىنشى رەت ساتىلىپ وتىرعان جوق. بۇعان دەيىن نىسان جەلتوقسان ايىندا قايتالاما ساۋداعا شىعارىلعان بولاتىن، ول كەزدە باعاسى 26 706 317 643 تەڭگە بولعان. ودان دا ەرتەرەك قۇنى 28 ملرد تەڭگەگە جەتكەن.
سونداي-اق، ساتىپ الۋشىلار بولماعان جاعدايدا بازار قالانىڭ كوممۋنالدىق مەنشىگىنە بەرىلۋى مۇمكىن ەكەندىگى حابارلانعان بولاتىن. ەسكە سالايىق، سوتقا دەيىنگى تەرگەۋ اياسىندا قايرات ساتىبالدى ۇلى «بايسات» بازارىنىڭ ۇلكەن بولىگىن ءوز ەركىمەن قايتارعان، ال ونىڭ ۇلىنا تيەسىلى بولىگى مەملەكەت مەنشىگىنە قايتارىلعان ەدى. بۇل تۋرالى بۇعان دەيىن الماتى پروكۋراتۋراسى حابارلاعان.