كوكشەتاۋدا سەرگەك جاسوسپىرىمدەر پوليسيا قىزمەتكەرلەرىنە ىقتيمال اۋىر زارداپتاردىڭ الدىن الۋعا كومەكتەستى، دەپ حابارلايدى infohub.kz سايتى.
وقيعا 4 تامىزدا ساعات 19:00 شاماسىندا بولدى. «102» ارناسىنا قالاداعى قوعامدىق ورىنداردىڭ بىرىندە بەلگىسىز ەر ادامنىڭ اگرەسسيۆتى ارەكەت ەتىپ، قوعامدىق ءتارتىپتى بۇزعانى تۋرالى حابارلاما ءتۇستى. اقمولا وبلىسى پوليسيا دەپارتامەنتىنىڭ ءباسپاسوز قىزمەتىنىڭ مالىمەتىنشە، قوڭىراۋعا جاقىن ماڭداعى پاترۋلدىك پوليسيا ەكيپاجى دەرەۋ شىققان.
وقيعا ورنىنا كەلگەن قىزمەتكەرلەر قوڭىراۋ شالعانداردىڭ جاسوسپىرىمدەر ەكەنىن انىقتادى. ولار بولعان وقيعاعا نەمقۇرايلى قاراماي، پوليسەيلەرگە ءتارتىپ بۇزۋشىنى كورسەتىپ، ەر ادامنىڭ قاتتى ماساڭ كۇيدە بولعانىن، اگرەسسيا تانىتىپ، ءتىپتى سەرىگىنە قول كوتەرگەنىن ايتتى.
ۇستاۋ كەزىندە ەر ادام باعىنباۋشىلىق تانىتتى: قاتتى بالاعاتتاپ، پوليسيا قىزمەتكەرلەرىنىڭ زاڭدى تالاپتارىنا جاۋاپ بەرمەدى جانە مەديسينالىق كۋالاندىرۋدان وتۋدەن باس تارتتى. وعان قاتىستى قۇقىق قورعاۋ ورگانى قىزمەتكەرىنىڭ زاڭدى تالابىنا باعىنباعانى ءۇشىن اكىمشىلىك ءىس قوزعالدى. مەديسينالىق كۋالاندىرۋ قورىتىندىسى بويىنشا ورتاشا دارەجەدەگى ماساڭ كۇيدە بولعان ونىڭ سەرىگى قوعامدىق ورىندا ماس كۇيىندە جۇرگەنى ءۇشىن اكىمشىلىك جاۋاپكەرشىلىككە تارتىلدى.
ۋاقىتشا ۇستاۋ يزولياتورىنا جەتكىزىلگەننەن كەيىن ۇستالعان ادام قۇقىققا قارسى ارەكەتىن جالعاستىرىپ، يۋ-داعى راكوۆينانى سىندىردى. م ۇلىككە زاقىم كەلتىرگەنى ءۇشىن ول ۇساق بۇزاقىلىق بويىنشا اكىمشىلىك جاۋاپكەرشىلىككە تارتىلدى. سونىمەن قاتار، سوت ەر ادامعا قاتىستى بيلىك وكىلىن قورلاۋ فاكتىسى بويىنشا قىلمىستىق ءىس قوزعاۋ تۋرالى شەشىم قابىلدادى. ءقازىر ول ۋاقىتشا ۇستاۋ يزولياتورىندا وتىر.
كەيىن بەلگىلى بولعانداي، سول كۇنى ەر ادام مەن ايەل رەسمي تۇردە نەكەلەرىن تىركەگەن. راسىمنەن كەيىن جۇبايلار بۇل وقيعانى اتاپ ءوتۋدى ۇيعارعان، الايدا الكوگولدى ىشىمدىك ءىشۋ جانجالعا اكەلىپ، پوليسيانىڭ ارالاسۋىمەن اياقتالعان.
اقمولا وبلىسىنىڭ پد ءباسپاسوز قىزمەتى بالالاردىڭ ۋاقتىلى قوڭىراۋى قۇقىققا قارسى ارەكەتتەردى جەدەل توقتاتۋعا جانە، مۇمكىن، اۋىر زارداپتاردىڭ الدىن الۋعا مۇمكىندىك بەرگەنىن اتاپ ءوتتى. سونداي-اق، ۇستالعان ادامنىڭ بۇرىن جاساعان قىلمىسى ءۇشىن باس بوستاندىعىنان ايىرۋ ورىندارىنان جاقىندا بوساعانى انىقتالدى.