بالانىڭ مۇرنىنان قان كەتۋى — كەز كەلگەن اتا-انانى ۇرەيلەندىرەتىن جاعداي. الايدا مامانداردىڭ ايتۋىنشا، بۇل ءاردايىم دەنساۋلىققا بايلانىستى كۇردەلى پروبلەمالاردىڭ بەلگىسى ەمەس. قازاقستاندىق پەدياتر نۇرجامال اۋباكىروۆا وسى جاعدايدى تۋدىراتىن بەس نەگىزگى فاكتوردى اتاپ، مۇرىننىڭ شىرىشتى قابىعىنا كۇتىم جاساۋ بويىنشا ۇسىنىستار بەردى، دەپ حابارلايدى infohub.kz.
ماماننىڭ ايتۋىنشا، بالالارداعى مۇرىننان قان كەتۋدىڭ ەڭ ءجيى سەبەبى — بولمەدەگى اۋانىڭ تىم قۇرعاق بولۋى. وسىعان بايلانىستى مۇرىن ىشىندە قابىرشاقتار پايدا بولادى، بالا ولاردى ءجيى الىپ تاستاۋعا تىرىسادى، بۇل قان تامىرلارىنىڭ زاقىمدالۋىنا اكەلەدى. مۇنداي جاعدايدا پاتەردەگى ىلعالدىلىقتىڭ وڭتايلى دەڭگەيىن ساقتاۋ، سونداي-اق شىرىشتى قابىقتى ىلعالداندىراتىن زاتتاردى، مىسالى، اكۆاماريس قولدانۋ ماڭىزدى.
ەكىنشى ءجيى كەزدەسەتىن فاكتور — ۆيرۋستىق ينفەكسيالار. اۋرۋ كەزىندە قان تامىرلارى سىنعىش بولادى، بۇل قان كەتۋ ءقاۋپىن ارتتىرادى. بۇل جاعدايدا پەدياتر مۇرىندى تۇزدى ەرىتىندىلەرمەن شايۋمەن شەكتەلۋگە كەڭەس بەرەدى.
ءۇشىنشى سەبەپ — نازيۆين نەمەسە وتريۆين سياقتى تامىر تارىلتاتىن تامشىلاردى دۇرىس قولدانباۋ. ولاردى كۇنىنە ءۇش رەتتەن ارتىق ەمەس جانە قاتارىنان بەس كۇننەن ۇزاق قولدانۋعا بولادى. سونداي-اق گورمونالدى مۇرىن سپرەيلەرىن باقىلاۋسىز قولدانۋ قان كەتۋدى تۋدىرۋى مۇمكىن — ولاردى تەك دارىگەردىڭ تاعايىنداۋى بويىنشا جانە شەكتەۋلى ۋاقىت ىشىندە قولدانۋ كەرەك.
ءتورتىنشى سەبەپ — مۇرىن جاراقاتتارى نەمەسە بوگدە زاتتاردىڭ بولۋى. ەگەر ءىرىڭدى اعۋ بايقالسا، قان تەك ءبىر تاناۋدان كەلسە، ال بىتەلۋ دە ءبىرجاقتى بولسا، بالانى مىندەتتى تۇردە دارىگەرگە كورسەتۋ قاجەت.
بەسىنشى سەبەپ رەتىندە پەدياتر تاپشىلىق جاعدايلاردى، اتاپ ايتقاندا تەمىر مەن D دارۋمەنىنىڭ جەتىسپەۋشىلىگىن اتايدى. ولار قان تامىرلارىن سىنعىش ەتەدى جانە ءجيى قان كەتۋگە ىقپال ەتەدى. سوندىقتان بالانىڭ تەڭگەرىمدى تاماقتانۋىن قامتاماسىز ەتۋ ماڭىزدى.
نۇرجامال اۋباكىروۆا اتاپ وتكەندەي: ەگەر قان كەتۋ تەز توقتاسا جانە سالماق جوعالتۋ، السىزدىك نەمەسە لەتارگيا سياقتى بەلگىلەرمەن قاتار جۇرمەسە، الاڭداۋعا نەگىز جوق. ايتپەسە، ماماننىڭ كەڭەسى قاجەت.
بۇعان دەيىن دارىگەر «ستوپديار» جانە «ەنتەروفۋريل» سياقتى تانىمال پرەپاراتتاردىڭ بالالارداعى قۇسۋ مەن ديارەيا كەزىندە ءتيىمسىز ەكەنىن اتاپ وتكەن بولاتىن.