قازاقستان پرەمەر-مينيسترى ولجاس بەكتەنوۆ جاڭا وقۋ جىلى باستالعانعا دەيىن 100-دەن استام مەكتەپتەگى جوندەۋ جۇمىستارىن اياقتاۋدى تاپسىردى. بۇل تۋرالى 18 تامىزداعى ۇكىمەت وتىرىسىندا مالىمدەلدى، دەپ حابارلايدى infohub.kz سايتى.
ۇكىمەت باسشىسى ءوز سوزىندە 1 قىركۇيەكتە 47 جاڭا مەكتەپتىڭ ەسىگىن اشاتىنىن، ونىڭ 20-سى «كەلەشەك مەكتەپتەرى» جوباسى اياسىندا سالىنعانىن اتاپ ءوتتى. ول ءوڭىر اكىمدىكتەرىنە وقۋ وردالارىنىڭ وقۋ جىلى باستالعانعا دەيىن تولىق فۋنكسيونالدىق دايىندىعىن قامتاماسىز ەتۋدى تاپسىردى.
«وڭىرلەر 2026 جىلدىڭ سوڭىنا دەيىن تاعى 64 مەكتەپتىڭ قۇرىلىسىن اياقتاۋى قاجەت. ءقازىردىڭ وزىندە ولاردى پەداگوگتارمەن جانە وقۋ-تەحنيكالىق بازامەن قامتاماسىز ەتۋدىڭ بارلىق ماسەلەلەرىن شەشۋ كەرەك. 1 قىركۇيەككە دەيىن ەلىمىزدەگى 106 مەكتەپتە كۇردەلى جانە اعىمداعى جوندەۋ جۇمىستارىن اياقتاۋ تالاپ ەتىلەدى»، — دەپ اتاپ ءوتتى بەكتەنوۆ.
پرەمەر ءبىرقاتار وڭىردەگى، ونىڭ ىشىندە الماتى، اباي وبلىسى، اقمولا، باتىس قازاقستان جانە باسقا دا ايماقتارداعى 13 مەكتەپتەگى جۇمىس قارقىنىنىڭ تومەندىگىنە نازار اۋداردى. ول وسى وڭىرلەردىڭ اكىمدەرىنە جوندەۋ جۇمىستارىن بەلگىلەنگەن مەرزىمدە اياقتاۋدى جەكە باقىلاۋعا الۋدى تاپسىردى.
سونىمەن قاتار، بيىلعى 1 قىركۇيەككە دەيىن فيزيكا، حيميا، بيولوگيا جانە روبوتوتەحنيكا پاندەرى بويىنشا 500 پاندىك كابينەت ساتىپ الۋدى قامتاماسىز ەتۋ قاجەت. جىل سوڭىنا دەيىن ەلىمىزدىڭ مەكتەپتەرىندە 1400-دەن استام ارنايى كابينەت ورناتۋ كەرەك. ءبىرقاتار ءوڭىر قارجىلاندىرۋ ماسەلەلەرىن قىسقا مەرزىمدە شەشۋى ءتيىس.
سونداي-اق پرەمەر كابينەتتەرگە قاجەتتى قۇرال-جابدىقتاردى جەدەل ساتىپ الۋ ءۇشىن بارلىق راسىمدەردى جىلدامداتۋدى تاپسىردى.