قازاقستان پرەمەر-مينيسترى ولجاس بەكتەنوۆ ۇكىمەت وتىرىسىندا حالىقتى الەۋمەتتىك قورعاۋ جانە ەڭبەك ءمينيسترى اسقاربەك ەرتاەۆقا ەڭبەك نارىعىنداعى احۋال مەن بوس جۇمىس ورىندارىنىڭ سانى تۋرالى سۇراق قويدى، دەپ حابارلايدى infohub.kz سايتى.
مينيستر ەرتاەۆتىڭ مالىمەتىنشە، جىل باسىنان بەرى ەلەكتروندى ەڭبەك بيرجاسىندا جۇمىس بەرۋشىلەر 845 مىڭ بوس جۇمىس ورنىنا ءوتىنىم بەرگەن، ونىڭ 432 مىڭى — جۇمىسشى ماماندىقتارى بويىنشا. ونىڭ ايتۋىنشا، ازاماتتاردىڭ 60-70 پايىزى وسى پورتال ارقىلى جۇمىس تابادى، الايدا 30-40 پايىز بوس ورىنعا قىزمەتكەر تاڭداۋ مۇمكىن بولماي وتىر، سوندىقتان كومپانيالار ۋاقىتشا شەتەلدىك جۇمىس كۇشىن تارتۋعا ءماجبۇر. جىل سايىن ەلگە جۇمىسقا ورنالاسۋ ءۇشىن شامامەن 300 مىڭ شەتەلدىك كەلەدى.
ۇكىمەت باسشىسى جۇمىس ىستەگىسى كەلەتىندەردىڭ بارلىعىنا جۇمىسقا ورنالاسۋ مۇمكىندىگى بار-جوعىن ناقتىلادى. «800 مىڭنان استام، شامامەن 1 ميلليون بوس جۇمىس ورنى بار، سولاي ما؟ ياعني، جۇمىس ىستەگىسى كەلەتىن ادامعا جۇمىس تابىلادى، سولاي ما؟ ءبىز شەتەلدەن مىڭداعان مامانداردى تارتۋعا ءماجبۇرمىز! جۇمىس توقتاپ قالماس ءۇشىن، سولاي ما؟» — دەپ سۇرادى ول. ەڭبەك ءمينيسترىنىڭ راستاۋىنان كەيىن ولجاس بەكتەنوۆ قازاقستانداعى ەڭبەك نارىعىنىڭ احۋالىنا قاتىستى ەموسيونالدى پىكىر ءبىلدىردى: «بۇل حالىققا ءتۇسىندىرىلۋى كەرەك! ەلدە "جۇمىس جوق" دەگەن ءسوز بولماۋى ءتيىس. ونداي جوق».