قازاقستان پرەمەر-مينيسترى ولجاس بەكتەنوۆ «قازاۆتوجول» ۇلتتىق كومپانياسىنىڭ جۇمىسىنا كوڭىلى تولماي، ونىڭ باسشىسى دارحان يماناشەۆكە كادرلىق شەشىمدەر قابىلداۋى مۇمكىن ەكەنىن ەسكەرتتى. مىڭداعان شاقىرىم تراسسانى جوندەۋ جوسپارلانعانىمەن، جول ساپاسىنا قاتىستى كوپتەگەن ماسەلە شەشىلمەي تۇرعانىن ۇكىمەت باسشىسى اتاپ ءوتتى، دەپ حابارلايدى infohub.kz سايتى.
ۇكىمەت وتىرىسىندا دارحان يماناشيەۆ 2026 جىلدىڭ سوڭىنا دەيىن 2 مىڭنان استام شاقىرىم رەسپۋبليكالىق جولدى جوندەۋدى اياقتاپ، پايدالانۋعا بەرۋ جوسپارلانعانىن باياندادى. بارلىعى 70 جوبا اياسىندا جۇمىس جۇرگىزىلۋدە.
ونىڭ ايتۋىنشا، تاعى 4 242 شاقىرىم 141 نىساندا ورتاشا جوندەۋمەن قامتىلعان. وسى ۋچاسكەلەردىڭ جارتىسىنا جۋىعى جىل سوڭىنا دەيىن تاپسىرىلۋى ءتيىس.
«قازاۆتوجول» باسشىسى مەردىگەرلەردىڭ جوندەۋ ساپاسىنا جاۋاپكەرشىلىگى كۇشەيتىلگەنىن دە ايتتى. كەپىلدىك مەرزىمى ەكى جىلدان بەس جىلعا ۇزارتىلىپ، سوڭعى ءۇش جىلدا جۇمىس تەحنولوگياسى وزگەرگەن.
«بۇرىن تەك توزعان جوعارعى قابات جاڭارتىلاتىن. ءقازىر جول نەگىزىنىڭ جوعارعى قاباتى نىعايتىلىپ، سودان كەيىن ەكى قابات اسفالتبەتون توسەلەدى. بۇل رەتتە توپىراق توسەمىنىڭ تومەنگى قاباتتارى مەن جول نەگىزى قوزعالمايدى»، — دەدى ول.
باياندامادان كەيىن ولجاس بەكتەنوۆ يماناشيەۆ كوپتەگەن ماسەلەنى ايتپاعانىن مالىمدەدى. پرەمەر-مينيستر بۇعان دەيىن قازاقستان پرەزيدەنتى اتاپ كورسەتكەن جول سالاسىنداعى كەمشىلىكتەردى دە ەسكە سالدى.
«بايانداما جاقسى. الايدا شەشىمىن تاپپاي جۇرگەن كوپتەگەن ماسەلە بار، ولاردى ايتپادىڭىز. پرەزيدەنت اتاپ وتكەن بارلىق كەمشىلىك تىكەلەي ءسىزدىڭ جۇمىسىڭىزعا دا قاتىستى. سوندىقتان جول ساپاسىن جاقسارتۋ قاجەت. جۇمىس ىستەڭىز، ايتپەسە بۇل ماسەلە بويىنشا باسقا ادامدار جۇمىس ىستەيتىن بولادى»، — دەدى بەكتەنوۆ.
دارحان يماناشيەۆ «قازاۆتوجولدى» 2023 جىلدىڭ جەلتوقسانىنان باستاپ باسقارىپ كەلەدى. ول تاعايىندالماي تۇرىپ، «قازاۆتوجول» اق مەن «قازاقاۆتودور» ج ش س بىرىكتىرىلگەن: بۇرىن ءبىر كومپانيا جول جۇمىستارىنا تاپسىرىس بەرۋشى، ەكىنشىسى ورىنداۋشى بولاتىن. پرەزيدەنتتىڭ تاپسىرماسى بويىنشا فۋنكسيالاردىڭ قايتالانۋىن جانە جاۋاپكەرشىلىكتىڭ ب ۇلىڭعىر بولۋىن جويۋ ءۇشىن ولار ءبىرىڭعاي وپەراتورعا بىرىكتىرىلدى.
ونىڭ تۇسىندا اقىلى جولداردان تۇسەتىن كىرىس 2023 جىلعى 32 ملرد تەڭگەدەن 2025 جىلى 86 ملرد تەڭگەگە ءوستى. ءقازىر قازاقستاندا جالپى ۇزىندىعى شامامەن 5 مىڭ شاقىرىم بولاتىن 26 اقىلى ۋچاسكە جۇمىس ىستەيدى، ءبىر جىلدا ولاردا 70 ملن-نان استام ءجۇرىپ ءوتۋ تىركەلگەن. قاراجات جول جەلىسى مەن ينفراقۇرىلىمىن ۇستاۋعا جۇمسالادى.
دارحان يماناشەۆتىڭ ءوزى جول سالاسىندا 2004 جىلدان بەرى ەڭبەك ەتەدى: جول شەبەرى بولىپ باستاپ، كەيىن «قازاقاۆتودوردا» جانە كولىك مينيسترلىگىندە جۇمىس ىستەگەن، قاراعاندى اكىمىنىڭ ورىنباسارى بولعان جانە قۇرىلىس سالاسىندا ەڭبەك ەتكەن.
بۇعان دەيىن «كۋرسيۆ» «قازاۆتوجول» اق باسقارما ءتوراعاسى دارحان يماناشيەۆ ۇكىمەتتەگى بريفينگتە سۋىق مەزگىلدە جول جوندەۋ تۋرالى سۇراققا جاۋاپ بەرگەنىن جازعان.