قازاقستان پرەمەر-مينيسترى ولجاس بەكتەنوۆ ماۋسىمارالىق كەزەڭدە الەۋمەتتىك ماڭىزى بار كوكونىس ونىمدەرىنىڭ تاپشىلىعىنا جول بەرمەۋدى جانە باعانىڭ قىمباتتاۋىن بولدىرماۋدى تاپسىردى، دەپ حابارلايدى infohub.kz سايتى.
ۇكىمەتتىڭ ءباسپاسوز قىزمەتى مالىمدەگەندەي، بۇل ءۇشىن قازاقستان وڭىرلەرىندە قىسقى جانە كوكتەمگى كەزەڭگە كوكونىس قورلارى جاساقتالادى. ۇكىمەت كوكونىس ونىمدەرىنىڭ قىسقى جانە كوكتەمگى كەزەڭگە ارنالعان قورلارىن قالىپتاستىرۋ جۇمىستارىن كۇشەيتەدى.
«باسىم باعىت – قىسقى جانە كوكتەمگى كەزەڭگە كوكونىس، اسىرەسە كارتوپ قورلارىن جاساقتاۋ. ەگىن جيناۋ ناۋقانى بارىسىندا قاجەتتى كولەمدەردى ۋاقىتىلى كەلىسىمشارتقا بايلانىستىرىپ، ولاردى ساتىپ الۋدى جانە ساقتاۋعا قويۋدى ۇيىمداستىرۋ ماڭىزدى. وڭىرلەردىڭ اكىمدىكتەرى بۇل ماسەلەنى باقىلاۋعا الىپ، ماۋسىمارالىق كەزەڭدە الەۋمەتتىك ماڭىزى بار كوكونىس ونىمدەرىنىڭ تاپشىلىعىنا نەمەسە باعاسىنىڭ قىمباتتاۋىنا جول بەرمەۋى كەرەك. سونىمەن قاتار، ارتىق ءونىمدى ەكسپورتقا باعىتتاعان ءجون. ساۋدا جانە كولىك مينيسترلىكتەرى اگرارلارعا وتكىزۋ نارىقتارىن ىزدەۋگە جانە ءونىمدى ساتۋعا كومەك كورسەتۋى ءتيىس»، – دەپ تاپسىردى ۇكىمەت باسشىسى.