قازاقستان پرەمەر-مينيسترى ولجاس بەكتەنوۆ وڭىرلىك بيلىككە ماۋسىمارالىق كەزەڭدە كوكونىس تاپشىلىعىنا نەمەسە باعانىڭ قىمباتتاۋىنا جول بەرمەۋ ماسەلەسىن جەكە باقىلاۋعا الۋدى تاپسىردى. ءتيىستى تاپسىرمانى ۇكىمەت باسشىسى اكىمدىكتەرگە جولدادى، دەپ حابارلايدى infohub.kz سايتى.
بەكتەنوۆتىڭ ايتۋىنشا، قىسقى جانە كوكتەمگى كەزەڭگە كوكونىس، ەڭ الدىمەن كارتوپ قورىن قالىپتاستىرۋ — باسىم باعىت. ول ەگىن جيناۋ ناۋقانى بارىسىندا قاجەتتى كولەمدى ۋاقىتىلى كەلىسىمشارتتاپ، ولاردى ساتىپ الۋ مەن ساقتاۋعا قويۋدى ۇيىمداستىرۋ ماڭىزدى ەكەنىن اتاپ ءوتتى.
«سونىمەن قاتار ءونىمنىڭ ارتىعىن ەكسپورتقا باعىتتاۋ كەرەك. ساۋدا جانە كولىك مينيسترلىكتەرى اگراريلەرگە وتكىزۋ نارىقتارىن ىزدەۋگە جانە ءونىمدى ساتۋعا جاردەمدەسسىن»، — دەپ تاپسىردى پرەمەر-مينيستر.
الەۋمەتتىك ماڭىزى بار كوكونىس باعاسىن ۇستاپ تۇرۋ اياسىندا قازاقستان كارتوپ ەكسپورتىنا شەكتەۋ قويا ما دەگەن سۇراق تۋىندايدى. اۋىل شارۋاشىلىعى ۆيسە-مينيسترى نازگۇل حاتەپوۆانىڭ ايتۋىنشا، بىلتىر ەل 388 مىڭ توننا كارتوپ ەكسپورتتاعان. بيىل دا ەكسپورتتىق الەۋەت 400 مىڭ توننا كولەمىندە كۇتىلۋدە.
«بۇعان قوسا، شەكتەۋلەر بىرنەشە رەت ەنگىزىلدى: بىلتىر جانە ودان بۇرىنعى جىلدارى. بۇل ءداستۇرلى يمپورتتاۋشىلارىمىز تاراپىنان سۇرانىستىڭ جوعارى بولۋىنا بايلانىستى. اتاپ ايتقاندا، وزبەكستان تاراپىنان»، — دەدى ول.
حاتەپوۆا الدىن الا كەلىسىمشارتتاۋ مەن جەتكىلىكتى قور قالىپتاستىرۋ ماۋسىمارالىق كەزەڭدە كوكونىس باعاسىن تۇراقتى ۇستاپ، نارىقتى جاساندى تاپشىلىقتان قورعاۋعا كومەكتەسەتىنىن قوستى.
بۇعان دەيىن «كۋرسيۆ» اۋىل شارۋاشىلىعى مينيسترلىگى سيىر ەتى باعاسىنىڭ كۇرت ءوسۋىن كۇتپەيتىنىن جازعان. قازىرگى تاڭدا ەل بويىنشا ەتتىڭ ورتاشا قۇنى كيلوگرامىنا شامامەن 3،8 مىڭ تەڭگە، الايدا استانادا كەيبىر بازارلاردا باعا شامامەن 4،5 مىڭ تەڭگەگە جەتەدى.