سولتۇستىك قازاقستان وبلىسىنداعى بەسكول اۋىلىنىڭ تۇرعىندارى كوزى اشىلمايتىن ساسىق يىسكە شاعىمدانۋدا، دەپ حابارلايدى infohub.kz سايتى.
Almaty.tv تەلەارناسىنىڭ مالىمەتىنشە، قالا ماڭىنداعى بەسكول اۋىلىنىڭ تۇرعىندارى وسى كۇندەرى تەرەزەنى ايقارا اشۋدى ارماندايدى، ءبىراق جاز بويى تىنىس تارىلتاتىن اۋاعا شىداپ، تەرەزەنى مىقتاپ جاۋىپ قويۋعا ءماجبۇر. سەبەبى — ماڭايدى ءجيى قاپتايتىن وتكىر، اششى ءيىس. ادامداردىڭ ايتۋىنشا، اسىرەسە كەشكى ۋاقىتتا ساسىق ءيىس قاتتى سەزىلەدى.
«ۇيرەكتى، قازدى ورتەگەندە عوي، ءيىس وسىدان شىعادى، كوڭنەن دە. ال كوڭ بۇرىننان بار ەدى. ارينە، قيىن، مەن وسى ماڭدا تۇرامىن. كارى انامدى قولتىعىنان دەمەپ، دالاعا تازا اۋا جۇتۋعا شىعارامىن. مۇندا قانداي تازا اۋا؟ انام 100 جاستا، بالالار دا سولاي — ۇيگە كىرگەندە كيىمدەرىنىڭ ءبارى ساسىپ تۇرادى»، — دەدى بەسكول اۋىلىنىڭ تۇرعىنى ەنشىباي باشەنوۆ.
باسقا تۇرعىندار دا ونىڭ ءسوزىن راستايدى.
«ءۇيدى جەلدەتۋ مۇمكىن ەمەس، ويتكەنى شىداماس ءيىس تۇر. بۇل نە ۇيرەك قوراسى، نە قۇس ساڭعىرىعى، نە قاۋىرسىن ورتەۋ — بىلمەيمىن، ءبىراق شىداۋ مۇمكىن ەمەس. ساسىعان ءيىس. بۇرىن مۇنداي ءيىس بولعان ەمەس. وسىعان بىردەڭە ىستەۋ كەرەك»، — دەپ ناليدى بەسكول اۋىلىنىڭ تۇرعىنى مادينا شوپشيباەۆا.
بۇل قورقىنىشتى ساسىق ءيىستىڭ قايدان شىققانىن ەشكىم ناقتى ايتا المايدى. ادامدار كۇدىگىن جاقىن ماڭداعى كاسىپورىندارعا اۋدارۋدا. ىقتيمال كوزدەردىڭ قاتارىندا بىرنەشە قۇس فابريكاسى مەن پروتەين زاۋىتى بار، ءبىراق بۇل ازىرگە تەك جورامال. اسىرەسە جاعىمسىز يىستەن اۋىلدىڭ قارت تۇرعىندارى قاتتى زارداپ شەگۋدە.
تۇرعىنداردىڭ تۇراقتى شاعىمدارىنا جەرگىلىكتى بيلىك جاۋاپ بەردى. ساسىق ءيىستىڭ كوزىنە قاتىستى ءوز ۇكىمىن ءتيىستى قىزمەتتەر شىعارۋى ءتيىس.
«بىرنەشە كاسىپورىن — ءيا. ءيىستىڭ قايدان شىققانىن بىلمەيمىز. سوندىقتان ءقازىر انىقتاۋ كەرەك، كوميسسيالىق تۇردە بارىپ، تەكسەرىپ، وسى جۇمىستىڭ ءبارىن جۇرگىزۋ قاجەت»، — دەدى بەسكول اۋىلدىق وكرۋگىنىڭ اكىمى باۋىرجان مۋسين.
سونداي-اق جۋرناليستەر تۇرعىندار كورسەتكەن كاسىپورىنداردىڭ ءبىرىنىڭ وكىلدەرىنە جۇگىندى. ءبىراق ول جەردە بارلىق كۇدىكتى جوققا شىعاردى.
«ءبىز ەشقانداي ولەكسە ورتەمەيمىز. بىزدە بارلىق ءتيىستى قۇجاتتار، كەلىسىمشارتتار بار. قايتا وڭدەۋگە تاپسىرامىز. ءوز تاراپىمىزدان كەز كەلگەن تەكسەرۋگە دايىنبىز»، — دەدى كاسىپورىن وكىلى ماعجان اۋكە.
ەندى بۇل وقيعاعا كوميسسيا نۇكتە قويۋى ءتيىس. ول بەسكولدەگى اۋانى ناقتى نە ءبۇلدىرىپ جاتقانىن جانە بۇعان كاسىپورىنداردىڭ كىناسى بار-جوعىن انىقتاۋى كەرەك. ەگەر ساسىق ءيىستىڭ سەبەبى تابىلماسا، تۇرعىندار بۇل ماسەلەنى جوعارى ورگاندارعا جەتكىزۋدى كوزدەپ وتىر.