قازاقستان مەن Binance حالىقارالىق تولەمدەر مەن اۋدارىمدارعا ارنالعان ايماقتىق ەسەپ ايىرىسۋ حابىن دامىتۋ تۋرالى كەلىستى. ءتيىستى مەموراندۋمعا ق ر ۇلتتىق بانكى مەن حالىقارالىق كومپانيا قول قويدى، دەپ حابارلايدى infohub.kz سايتى.
ۇلتتىق بانكتىڭ مالىمەتىنشە، قۇجاتقا بانك ءتوراعاسىنىڭ ورىنباسارى بينۇر جالەنوۆ پەن Binance جاھاندىق كەڭسەسىنىڭ ايماقتىق دامۋ جانە وپەراسيالىق قىزمەت جونىندەگى باسشىسى كيريلل حومياكوۆ قول قويدى. راسىمگە ۇلتتىق بانك ءتوراعاسى تيمۋر سۇلەيمەنوۆ پەن Binance نەگىزىن قالاۋشى چانپەن چجاو قاتىستى.
بولاشاق حاب حالىقارالىق تولەمدەر مەن اقشا اۋدارىمدارىن جۇزەگە اسىرۋعا باعىتتالادى، ونىڭ ىشىندە ورتالىق ازيا، تمد جانە شىعىس ەۋروپا ەلدەرىندەگى Binance كليەنتتەرىنىڭ سيفرلىق اكتيۆتەرمەن وپەراسيالارى بويىنشا ەسەپ ايىرىسۋلار دا قامتىلادى.
جوبا اياسىندا قازاقستاندا Binance توبىنىڭ ءتيىستى ۇيىمىن قۇرۋ جانە ۇلتتىق بانكتىڭ ءبىرىنشى ساناتتاعى تولەم ۇيىمى رەتىندە قىزمەتتى جۇزەگە اسىرۋعا ليسەنزياسىن الا وتىرىپ، قاجەتتى ينفراقۇرىلىمدى جاساۋ جوسپارلانۋدا، دەپ اتاپ ءوتتى ەلدىڭ ورتالىق بانكىندە.
قازاقستاندا جوبانى ىسكە قوسۋ سيفرلىق اكتيۆتەردى رەتتەۋ سالاسىنداعى رەفورمالار مەن قارجى نارىعىنىڭ جاڭا سۋبەكتىسى – ءبىرىنشى ساناتتاعى تولەم ۇيىمىن ەنگىزۋدەن كەيىن مۇمكىن بولدى. جاڭا ەرەجەلەر حالىقارالىق كومپانيالاردىڭ قاتىسۋىن كەڭەيتۋگە جانە يننوۆاسيالىق تولەمدىك جانە قارجىلىق سەرۆيستەردى دامىتۋعا مۇمكىندىك بەرەدى.
Binance جاڭا رەتتەۋ اياسىندا جوبانى ىسكە اسىرا باستاعان العاشقى جاھاندىق كومپانيالاردىڭ ءبىرى بولدى. Binanceء-تىڭ ايماقتىق وپەراسيالارىنىڭ ءبىر بولىگى قازاقستانعا اۋىستىرىلادى دەپ كۇتىلۋدە. بۇل كومپانيانىڭ ايماقتاعى كليەنتتەرىنىڭ ەداۋىر بولىگىنە قازاقستاندىق يۋريسديكسيا ارقىلى قىزمەت كورسەتۋگە، سونداي-اق ەلگە حالىقارالىق تەحنولوگيالىق قۇزىرەتتەردى تارتۋعا مۇمكىندىك بەرەدى.
ۇلتتىق بانكتە جوبا سيفرلىق قارجىلىق قىزمەتتەر ەكسپورتىن دامىتۋعا جانە قازاقستاننىڭ سيفرلىق قارجى تەحنولوگيالارىنىڭ ايماقتىق ورتالىعى رەتىندەگى ءرولىن نىعايتۋعا ىقپال ەتەدى دەپ سانايدى. مەموراندۋمعا قول قويۋ قازاقستاننىڭ سيفرلىق قارجى ينفراقۇرىلىمىن دامىتۋ جانە ەلدىڭ جاھاندىق قارجى جۇيەسىنە ينتەگراسيالانۋى جولىنداعى تاعى ءبىر قادام بولدى.