بيتكوين باعامى 85 مىڭ دوللاردان اسىپ كەتتى. ال ءبىر اپتا بۇرىن بۇل كريپتوۆاليۋتا ورتا ەسەپپەن 75 مىڭ دوللاردان ساۋدالانىپ جاتقان. قازىرگى كورسەتكىش جىل باسىنان بەرگى ەڭ جوعارى دەڭگەيگە جەتتى، دەپ حابارلايدى infohub.kz سايتى.
2026 جىلعى 22 قىركۇيەكتەگى Investing.com دەرەكتەرى بويىنشا، الەمدەگى ەڭ تانىمال كريپتوۆاليۋتانىڭ قۇنى ماتەريال جازىلعان ساتتە ءبىر مونەتا ءۇشىن 86 مىڭ دوللارعا جەتتى. ال ءبىر اپتا بۇرىن ول ورتا ەسەپپەن 75 مىڭ دوللاردان ساۋدالانعان ەدى.
ايتا كەتەيىك، قازىرگى كورسەتكىش — جىل باسىنان بەرگى ەڭ جوعارىسى. بيتكوين سوڭعى رەت 2026 جىلدىڭ 27 قاڭتارىندا 85 مىڭ دوللاردان قىمبات تۇرعان. وسى كۇننەن كەيىن ول بىرنەشە رەت قۇلدىرادى، اسىرەسە اقش پەن يران اراسىنداعى سوعىس قاقتىعىسى باستالعاننان كەيىن.
ساراپشىلاردىڭ پىكىرىنشە، ول كەزدە باعامنىڭ تومەندەۋى ءىشىنارا پارسى شىعاناعىنداعى قاقتىعىستىڭ ۋشىعۋى اياسىندا دوللاردىڭ ايتارلىقتاي نىعايۋىمەن بايلانىستى بولدى: ينۆەستورلار تاۋەكەلدى اكتيۆتەرگە قاراجات سالعانشا، امەريكالىق ۆاليۋتانى ساتىپ الۋدى ءجون كوردى. ال ماۋسىمدا كريپتوۆاليۋتا 60 مىڭ دوللاردان دا تومەن ءتۇستى.
قازىرگى ءوسىمدى ساراپشىلار Strategy سياقتى ينستيتۋسيونالدىق الىپتاردىڭ بيتكويندى كوپتەپ ساتىپ الۋىمەن، بلوكچەيندە باعالى قاعازدارمەن ساۋدا جاساۋعا رۇقسات بەرگەن اقش رەتتەۋشىلەرىنىڭ وڭ شەشىمدەرىمەن، سونداي-اق ينۆەستورلاردىڭ ينفلياسياعا قاتىستى الاڭداۋشىلىعىن ازايتقان كەيبىر قىسقا مەرزىمدى ەكونوميكالىق فاكتورلارمەن تۇسىندىرەدى.