بلوگەر ەربولات جانابىلوۆتىڭ جۇبايى ەلميرا تولەگەنوۆا كۇيەۋىمەن جانجال كەزىندە تىعىلعان كيىم بولمەسىنەن تۇسىرىلگەن بەينەجازبانى جاريالادى. ونىڭ ايتۋىنشا، جۇبايى ونىڭ جەكە زاتتارى مەن تەلەفوندارىن الىپ قويماقشى، ءارى الەۋمەتتىك جەلىدەگى جازبالارىن ءوشىرىپ جاتىر. كەيىنىرەك بلوگەر قوسىمشا ستوريس جاريالاپ، توبەلەس پەن قول كوتەرۋ بولماعانىن ناقتىلادى، دەپ حابارلايدى infohub.kz سايتى.
العاشقى ۇندەۋىندە تولەگەنوۆا جانابىلوۆ اعالارىمەن بىرگە ءوزى وتىرعان بولمەگە كىرۋگە تىرىسىپ جاتقانىن مالىمدەدى.
«ول مەنىڭ جەكە زاتتارىمدى، تەلەفوندارىمدى الىپ قويىپ جاتىر. مەن قامالىپ، كيىم بولمەسىندە وتىرمىن»، — دەدى ەلميرا.
ونىڭ سوزىنشە، ول قۋاتى بەس پايىز قالعان ەكىنشى تەلەفوندى پايدالانعان. جازبا بارىسىندا تولەگەنوۆا قولدارىن كورسەتىپ، ولاردى قىزىل دەپ اتادى.
بلوگەر جۇبايىنىڭ تۋىستارىن مانيپۋلياسيا جاسادى دەپ ايىپتادى. ونىڭ تۇجىرىمىنشا، جانابىلوۆتىڭ ءوزى وتباسىنداعى جاعدايدى ول كوپشىلىككە جاريالايدى دەپ قورقادى.
جاريالانىمدارىنىڭ بىرىندە ەلميرا «شىداۋدان شارشاعانىن» جازىپ، كۇيەۋى تۋرالى اقپاراتتى اشاتىنىن ۋادە ەتتى. كەيىنىرەك ۇندەۋى، سونداي-اق باسقا دا بەينەلەر مەن فوتوسۋرەتتەر ونىڭ اككاۋنتىنان جوعالىپ كەتتى. الەۋمەتتىك جەلىدەگى قولدانۋشىلار پوليسيانى جاعدايدى تەكسەرۋگە شاقىردى.
العاشقى ۇندەۋىنەن كەيىن ەلميرا قوسىمشا ستوريس جاريالادى. ول جانجال تۋرالى جالعان جاڭالىقتار تاراي باستاعانىن ايتىپ، دەنە جاراقاتى تۋرالى بولجامداردى جوققا شىعاردى.
«ويلاعانداي قول كوتەرۋ بولعان جوق. مەن كيىم بولمەسىنە قامالدىم، سەبەبى ەربولات ەكىنشى تەلەفونىمدى الىپ قويماقشى بولدى»، — دەپ جازدى تولەگەنوۆا.
ول سونداي-اق 27 قىركۇيەكتە اجەسى قايتىس بولعانىن، ۇيگە جاقىندا عانا ورالعانىن حابارلادى. بلوگەر بولىپ جاتقاندى نازار اۋدارۋ ارەكەتى دەپ ساناماۋعا شاقىردى.
ەلميرانىڭ سوزىنشە، ءقازىر ول بالالارىمەن ۇيدە، جانىندا جاقىن ادامدارى بار. ول وزىنە كەلىپ، تىنىشتالعان سوڭ جاعدايدى تولىعىراق تۇسىندىرەتىنىن ۋادە ەتتى. تولەگەنوۆا سونداي-اق بلوگ جۇرگىزۋدە ۇزاق ءۇزىلىس الاتىنىن حابارلادى.
بۇعان دەيىن جۇبايلار ونلاين-كۋرستاردى ساتۋ تۋرالى ىسكە فيگۋرانت بولعان، ونىڭ اتىن جامىلىپ جۇلدە ويىندارى وتكىزىلگەن. 27 ساۋىردە استاناداعى سوت ولاردى زاڭسىز كاسىپكەرلىك پەن اقشانى جىلىستاتۋدا كىنالى دەپ تانىدى.
ەربولات جانابىلوۆقا پروباسيالىق باقىلاۋمەن ەكى جىل شارتتى جازا تاعايىندالدى. ەلميرا تولەگەنوۆا ەكى جىلعا باس بوستاندىعىنان ايىرىلدى، كامەلەتكە تولماعان بالالارى بولعاندىقتان جازانى وتەۋ ەكى جىلعا كەيىنگە شەگەرىلدى.