اقمولا وبلىسىندا پوليسيا قىزمەتكەرلەرى استانا – بۋراباي تاسجولىندا ءقاۋىپتى جاعداي تۋعىزعان BMW X5 جۇرگىزۋشىسىن جاۋاپكەرشىلىككە تارتتى، دەپ حابارلايدى infohub.kz سايتى.
3 تامىز كۇنى تۇستە «102» ارناسىنا ەلوردا تۇرعىنى حابارلاستى. ول كورسەتىلگەن تاسجولدا نەمىس كروسسوۆەرىنىڭ جۇرگىزۋشىسى جول قوزعالىسى ەرەجەلەرىن بىرنەشە رەت ورەسكەل بۇزىپ، باسقا جۇرگىزۋشىلەردىڭ قاۋىپسىزدىگىنە قاتەر توندىرگەنىن ايتتى.
ءوتىنىش بەرۋشىنىڭ سوزىنشە، جۇرگىزۋشى جولاقتار اراسىندا رەتسىز مانەۆر جاساپ، باسقا كولىكتەردى قىرقىپ ءوتىپ، مانەۆر كەزىندە بۇرىلىس كورسەتكىشتەرىن قولدانباعان. بارلىق بۇزۋشىلىق ۆيدەورەگيستراتورعا ءتۇسىپ، كۋاگەر جازبانى پوليسياعا تاپسىرعان.
حابارلاما تۇسكەن سوڭ پاترۋلدىك ەكيپاجدارعا كولىككە باعدار بەرىلدى. ناتيجەسىندە بۇزۋشىنىڭ جەكە باسى انىقتالدى. وعان قاتىستى اكىمشىلىك قۇقىق بۇزۋشىلىق تۋرالى كودەكستىڭ ەكى بابى بويىنشا اكىمشىلىك ءىس قوزعالدى. سونىمەن قاتار، جۇرگىزۋشىمەن جولدا ءقاۋىپتى مىنەز-ق ۇلىققا جول بەرمەۋ تۋرالى پروفيلاكتيكالىق اڭگىمە جۇرگىزىلدى.
الەۋمەتتىك جەلىلەردەگى ۆيدەوجازباعا تۇسىنىكتەمەدە BMW جۇرگىزۋشىسىنىڭ ءوزى دە پىكىر ءبىلدىردى. ول ءقاۋىپتى مانەۆر جاساعانىن، سەبەبى رۇقسات ەتىلگەن 140 كم/ساع كەزىندە سول جاق شەتكى جولاقتا 127 كم/ساع جىلدامدىقپەن ءجۇرىپ، جول بەرمەگەن ۆيدەوجازبا اۆتورىن «ساباق بەرگىسى» كەلگەنىن ايتتى.
BMW X5 جۇرگىزۋشىسى سونداي-اق ۆيدەو اۆتورىنا قارسى قارسى ارىز بەرگەنىن جانە باسقا كامەرالاردىڭ جازبالارىن قوسقانىن مالىمدەدى. ونىڭ ايتۋىنشا، ءوتىنىش بەرۋشىگە ءقازىردىڭ وزىندە حاتتاما تولتىرىلعان، الايدا ول ونىمەن كەلىسپەيدى.
بۇعان دەيىن بۋرابايعا بارا جاتقان اۆتوبۋس اپاتىنان 11 ادام زارداپ شەككەنى حابارلانعان بولاتىن.