سولتۇستىك قازاقستان وبلىسىنداعى بوروۆسكوە اۋىلىنىڭ تۇرعىندارى جولسىزدىققا شاعىمدانۋدا. جولدىڭ ناشارلىعىنان اۋىلدان تىسقارى جەرگە شىعۋ ءقاۋىپتى بولىپ وتىر. بۇل تۋرالى infohub.kz سايتى حابارلايدى.
اۋىلدا 53 ءۇي بار، وندا 140 ادام تۇرادى، ونىڭ كوپشىلىگى زەينەتكەرلەر. «جولىمىز تىم ناشار. گازەل بەرىلەدى، ءبىر ايدان كەيىن جاڭا گازەل سىنادى. جاڭبىر جاۋىپ، ودان كەيىن گازەل مۇلدەم كەلمەي قالدى. تۇرمىس توقتادى. ادامدار قايعىرىپ وتىر. ۇنەمى ءجۇرىپ، ومىرىڭنەن قورقاسىڭ. وسى گازەل كەز كەلگەن ساتتە اۋدارىلىپ كەتۋى مۇمكىن. قالادان 30 شاقىرىم جەردە تۇرىپ، 300 شاقىرىمداي ازاپ شەگەمىز»، – دەيدى تۇرعىن ناتاليا يلينىح.
جولدىڭ ناشارلىعىنان اۋىلعا جەدەل جاردەم جەتە المايدى، تاكسي جۇرگىزۋشىلەرى كەلۋدەن باس تارتادى. جەرگىلىكتى كاسىپكەرلەر دە زارداپ شەگىپ وتىر. «فيرمالار بىزگە تاۋار جەتكىزگىسى كەلمەيدى، جولدىڭ ناشارلىعىنا بايلانىستى. ولار جامان جولعا جەتىپ، كەيىن قايتىپ كەتەدى. تاۋار كەلمەيدى. كەيدە ءتىپتى ناندى دا جەتكىزبەيدى. حالىق بىرنەشە رەت نانسىز، تاۋارسىز، جەمىس-كوكونىسسىز قالعانىنا شاعىمدانادى»، – دەيدى دۇكەن ساتۋشىسى مارينا نەمچەنكو.
اۋىلدىق وكرۋگ اكىمدىگىنىڭ حابارلاۋىنشا، ىشكى اۋىلدىق جولدار مەن كىرەبەرىس جولداردى قيىرشىق تاسپەن توسەۋگە جوبا-سمەتالىق قۇجاتتاما بىلتىردان بەرى دايىن. «بوروۆسكوەعا اپاراتىن كىرەبەرىس جول – اۋداندىق ماڭىزى بار جول. نوۆوسيبيرسك – چەليابينسك تراسساسىنان 4،5 شاقىرىم. ىشكى اۋىلدىق جولدار پەتەرفەلد اۋىلدىق وكرۋگىنە قارايدى. جوبالار بار، 30-40 ميلليون تەڭگەگە دەيىن. شامامەن 70 ميلليون تەڭگە شىعادى. ءبىراق بيىل قاراجات بولىنبەدى»، – دەپ ءتۇسىندىردى پەتەرفەلد اۋىلدىق وكرۋگىنىڭ اكىمى اسىلحان قاسىموۆ.
اكىمنىڭ ايتۋىنشا، اۋداننىڭ باسقا ەلدى مەكەندەرىندە دە وسىنداي جاعداي قالىپتاسقان. بوروۆسكوە تۇرعىندارى ماسەلەنىڭ جاقىن ارادا شەشىلەتىنىنە ۇمىتتەنەدى.