بوزجىرا شاتقالىندا تۇسىرىلگەن جانجالدى ۆيدەو رەسمي تەكسەرىسكە ۇلاستى: ماڭعىستاۋ وبلىستىق پوليسيا دەپارتامەنتى كامەراعا دارەت سىندىرعان شەتەلدىك قىزدىڭ جەكە باسىن انىقتاپ، ماتەريالداردى سىرتقى ىستەر مينيسترلىگىنە جولدادى، دەپ حابارلايدى infohub.kz سايتى.
كانادالىق ۆيدەوگراف Olessia Pliousnina لاقاپ اتىمەن تاراعان كادرلار بۇعان دەيىن الەۋمەتتىك جەلىلەردە پايدا بولعان. وندا قىز ماڭعىستاۋ وبلىسىنداعى بوزجىرا شاتقالىنىڭ اۋماعىندا دارەت سىندىرادى. Instagram-داعى ءتۇپنۇسقا جازبا ءقازىر قولجەتىمسىز، ال ونىڭ پاراقشاسىنداعى ۆيدەونى Halyqstan Telegram-ارناسى جاريالاعان.
ماڭعىستاۋ وبلىستىق پوليسيا دەپارتامەنتى ۆيدەوجازبانى الەۋمەتتىك جەلىلەردەن تاپقانىن مالىمدەدى. قۇقىق قورعاۋشىلار شەتەلدىك ازاماتشانىڭ جەكە باسىن انىقتاپ، ونىڭ ارەكەتىن ۇساق بۇزاقىلىق دەپ سارالادى.
«پوليسيا قىزمەتكەرلەرى وسى قۇقىق بۇزۋشىلىقتى جاساعان شەتەلدىك ازاماتشانىڭ جەكە باسىن انىقتادى. تەكسەرۋ بارىسىندا كورسەتىلگەن بەينەماتەريالداردىڭ ول قازاقستان اۋماعىنان شىققاننان كەيىن جاريالانعانى بەلگىلى بولدى. جاسالعان قۇقىق بۇزۋشىلىق بويىنشا ماتەريالدار ءتيىستى ديپلوماتيالىق وكىلدىككە جەتكىزۋ ءۇشىن سىرتقى ىستەر مينيسترلىگىنە جولداندى»، — دەلىنگەن حابارلامادا.
ايتپاقشى، پوليسيا حابارلاعانداي، قازىرگى تاڭدا جاريالاۋ جۇرگىزىلگەن الەۋمەتتىك جەلىدەگى اككاۋنت جويىلىپ، قولجەتىمسىز بولىپ تۇر.
«ماڭعىستاۋ وبلىستىق پوليسيا دەپارتامەنتى قازاقستان رەسپۋبليكاسىنىڭ زاڭناماسىن مۇلتىكسىز ساقتاۋ قاجەتتىگىن ەسكە سالادى. كەز كەلگەن قوعامدىق ءتارتىپ بۇزۋشىلىق ءۇشىن جاۋاپكەرشىلىك قاراستىرىلعان»، — دەپ قوستى دپ-دا.
بۇعان دەيىن ءبىز مادەنيەت ۆيسە-مينيسترىنىڭ بوزجىرادا دارەت سىندىرعان شەتەلدىك قىز تۋرالى پىكىر بىلدىرگەنىن جازعان بولاتىنبىز.