2026 جىلدىڭ 1 قىركۇيەگىنەن باستاپ ماڭعىستاۋ وبلىسىندا ەرەكشە قورعالاتىن تابيعي اۋماقتارعا، ونىڭ ىشىندە ايگىلى بوزجىرا شاتقالىنا بارۋدىڭ جاڭا تاريفتەرى مەن ەرەجەلەرى ەنگىزىلەدى. ءتيىستى قاۋلىنى اكىمدىك 20 شىلدەدە بەكىتتى، دەپ حابارلايدى infohub.kz سايتى.

وزگەرىستەر « قىزىلساي» مەملەكەتتىك وڭىرلىك تابيعي پاركى مەن بەينەۋ اۋدانىنىڭ ورماندار مەن جانۋارلار دۇنيەسىن قورعاۋ مەكەمەلەرىنە اسەر ەتەدى. جاڭا باعا قولدانىلاتىن تانىمال ورىندار تىزىمىنە بوزجىرا، تۇزبايىر، قىزىلقۇپ شاتقالدارى جانە بوقتى تاۋى كىردى.

اقى تەك كىرۋ ءۇشىن عانا ەمەس، سونىمەن قاتار جەكەلەگەن قىزمەتتەر ءۇشىن دە الىنادى: تۋريستىك جولدار، كەمپينگتەردە ورنالاسۋ، كولىكپەن كىرۋ، فوتو جانە بەينەتۇسىرىلىم. قۇنى ايلىق ەسەپتىك كورسەتكىشكە (اەك) نەگىزدەلگەن.

ماسەلەن، تۋريستىك جولمەن سەرۋەندەۋ ادام باسىنا تاۋلىگىنە 0،2 اەك (865 تەڭگە)، كەمپينگتە نەمەسە شاتىرلى لاگەردە ورنالاسۋ — 0،1 اەك (شامامەن 433 تەڭگە)، ءفوتوتۇسىرىلىم — 4،4 اەك (19 030 تەڭگە)، كينو جانە بەينەتۇسىرىلىم — 8،7 اەك (37 627،5 تەڭگە) تۇرادى. ەكسكۋرسيا ۇيىمداستىرۋ 1،8 اەك (7 785 تەڭگە)، گيد قىزمەتى — 0،9 اەك (3 893 تەڭگە). تۋريستىك شاتىردى جالعا الۋ — 0،7 اەك (3 028 تەڭگە)، ۇيىقتايتىن قاپ — 0،3 اەك (1 298 تەڭگە).

اۆتوكولىكتەر ءۇشىن جەكە تاريفتەر قاراستىرىلعان: موتوسيكل، موپەد نەمەسە كۆادروسيكلمەن كىرۋ ءۇشىن 0،4 اەك (1 730 تەڭگە)، جەڭىل اۆتوموبيل — 0،7 اەك (3 028 تەڭگە)، ميكرواۆتوبۋس نەمەسە جۇك كولىگى — 2،7 اەك (11 678 تەڭگە)، اۆتوبۋس — 5 اەك (21 625 تەڭگە) تولەۋگە تۋرا كەلەدى. سونداي-اق اۆتوموبيل تۇراعى ءۇشىن اقى بەلگىلەنگەن — 0،2 اەك (865 تەڭگە).

مىسالى، ەكى ەرەسەك پەن 6-17 جاس ارالىعىنداعى ەكى وقۋشىدان تۇراتىن وتباسى جەڭىل كولىكپەن كەلىپ، تۇنەپ، تۋريستىك جولداردى پايدالانسا، شامامەن 7 787 تەڭگە تولەيدى. شاتىردى جالعا السا، سوما 10 815 تەڭگەگە دەيىن وسەدى.

كەيبىر ازاماتتار اۋماقتارعا تەگىن كىرە الادى: زەينەتكەرلەر، مۇگەدەكتىگى بار ادامدار، ۇلى وتان سوعىسىنىڭ ارداگەرلەرى، باسقا مەملەكەتتەر اۋماعىنداعى ۇرىس قيمىلدارىنىڭ ارداگەرلەرى، ەڭبەك ارداگەرلەرى جانە ۇوس قاتىسۋشىلارىنا تەڭەستىرىلگەن وزگە دە ساناتتار. التى جاسقا دەيىنگى بالالار دا اقىدان بوساتىلادى. مەكتەپ وقۋشىلارى مەن 6-17 جاس ارالىعىنداعى بالالارعا 50% جەڭىلدىك، كۇندىزگى وقۋ نىسانىنداعى ستۋدەنتتەرگە — 25% جەڭىلدىك قاراستىرىلعان. شەتەل ازاماتتارى ەكى ەسە كوپ تولەيتىن بولادى.

قاۋلى سونداي-اق قورعالاتىن اۋماقتاردا بولۋ ەرەجەلەرىن، ونىڭ ىشىندە ءجۇرۋ، دەمالۋ جانە تابيعي رەسۋرستاردى پايدالانۋ ءتارتىبىن بەكىتەدى. 2026 جىلدىڭ 1 قىركۇيەگىنە دەيىن بۇرىنعى تاريفتەر مەن ەرەجەلەر قولدانىلادى.

جاڭالىق الەۋمەتتىك جەلىلەردە قىزۋ پىكىرتالاس تۋدىردى. پايدالانۋشىلار، اسىرەسە، اقىنىڭ تەك شەتەلدىكتەر ءۇشىن ەمەس، جەرگىلىكتى تۇرعىندار ءۇشىن دە ەنگىزىلۋىنە تاڭدانىس پەن نارازىلىق بىلدىرۋدە. «مىنا اقى قانداي قاجەتتىلىككە جانە كىمنىڭ قالتاسىنا تۇسەدى ەكەن»، «قورقىنىشتى. وسى قارقىنمەن جاقىندا تەڭىزگە تەگىن جاقىنداي المايمىز — تەك الدىن الا جازىلىپ، كىرۋ اقىسىن تولەپ»، «تەڭىزگە قاراۋعا دا اقى تولەتىڭدەر»، — دەپ جازادى پايدالانۋشىلار.

بۇعان دەيىن «كاسپي» الەۋمەتتىك-كاسىپكەرلىك كورپوراسياسى ماڭعىستاۋ وبلىسىندا گلەمپينگتەر سالۋعا 500 ملن تەڭگە تارتاتىنى حابارلانعان بولاتىن.