قازاقستاننىڭ ءبىرىنشى راكەتكاسى، الەمدىك رەيتينگتە 11-ورىندا تۇرعان الەكساندر بۋبليك ATP-250 ساناتىنداعى Swiss Open Gstaad-2026 ءتۋرنيرىنىڭ ءبىرىنشى اينالىمىنداعى ماچتى فرانسۋز كەنتەن اليسپەن (90-راكەتكا) كەشە باستاپ، بۇگىن وكىنىشتى جەڭىلىسپەن اياقتادى – 7:6 (7:4)، 4:6، 6:7 (5:7). بيىك تاۋلى شۆەيساريالىق كۋرورتقا جاۋعان نوسەر كەسىرىنەن كەزدەسۋ ۇزىلگەن بولاتىن، دەپ حابارلايدى infohub.kz سايتى.
كەشە تورەشىلەر ماچتى ءۇشىنشى سەتتە 6:5 15:0 ەسەبىمەن قازاقستاندىق، ياعني گشتاادتىڭ قازىرگى چەمپيونى پايداسىنا بولعان كەزدە توقتاتتى. ويىن قايتا جالعاسقان سوڭ اليس گەيمدى ۇتىپ، شەشۋشى پارتيانى تاي-برەيككە جەتكىزدى. ون ءۇشىنشى گەيم بۋبليك ءۇشىن ءساتسىز بولدى: فرانسۋز 4:0 ەسەبىمەن العا شىقتى، قازاقستاندىق ايىرمانى بارىنشا قىسقارتتى – 4:5، ءبىراق سوڭعى ءسوز كەنتەندە قالدى – 7:5.
وسىلايشا، ءبىرىنشى الەكساندر وتكەن جىلعى تيتۋلىن قورعاي المادى، ال اليس شيرەك فينالدا ەكىنشى الەكساندرمەن وينايدى.
الەكساندر شەۆچەنكونىڭ (100-راكەتكا) دومينيك شتريكەرمەن (360-راكەتكا) ماچىن دا كەشە جاڭبىر ءۇزدى. توقتاتىلعان كەزدە تۋرنير ۇيىمداستىرۋشىلارىنان ۋايلد-كارد العان شۆەيساريالىق برەيكپەن 4:3 ەسەبىمەن الدا تۇرعان ەدى. الايدا ءبىزدىڭ تەننيسشى كەزدەسۋ بارىسىن وزگەرتە الدى جانە شتريكەرگە تريبۋنالاردىڭ قاتتى قولداۋ كورسەتۋىنە قاراماستان، ەكى سەتتە جەڭىسكە جەتتى – 7:6 (7:5)، 6:2.
Swiss Open Gstaad ءتۋرنيرى – شۆەيساريانىڭ تەننيستەن اشىق چەمپيوناتى 1915 جىلدان بەرى وتكىزىلىپ كەلەدى. 1967 جىلعا دەيىن ءارتۇرلى قالالاردا وتسە، 1968 جىلى شۆەيساريا الپىسىندەگى تانىمال تاۋ شاڭعىسى كۋرورتى گشتاادتا تۇراقتى ورنىن تاپتى. ول ەۋروپاداعى ەڭ بيىك تاۋلى اتپ ءتۋرنيرى سانالادى (تەڭىز دەڭگەيىنەن 1050 مەتر).
2009 جىلدان باستاپ تۋرنير ATP-250 ساناتىنا جاتادى. جالپى جۇلدە قورى 612،5 مىڭ ەۋرونى قۇرايدى.
ءار جىلدارى Swiss Open Gstaad جەڭىمپازدارى شۆەيساريالىق رودجەر فەدەرەر، رەسەيلىك ەۆگەني كافەلنيكوۆ، شۆەد ستەفان ەدبەرگ، ارگەنتينالىق گيلەرمو ۆيلياس جانە باسقا دا جۇلدىزدار بولدى.