الماتى وبلىسىنىڭ بورالداي اۋىلىندا Carlsberg Kazakhstan كومپانياسىنىڭ جاڭا الكوگولسىز سۋسىندار زاۋىتى سالتاناتتى تۇردە ىسكە قوسىلدى. كاسىپورىنعا سالىنعان ينۆەستيسيا كولەمى $344 ملن-دى قۇرادى، ال ونىڭ قۋاتى جىلىنا 1 ملرد ليترگە دەيىن سۋسىن شىعارۋعا مۇمكىندىك بەرەدى، دەپ حابارلايدى infohub.kz سايتى.
ءونىم PepsiCo كومپانياسىنىڭ ليسەنزياسى بويىنشا وندىرىلەدى. سۋسىنداردى تەك قازاقستاندىق نارىققا عانا ەمەس، تمد ەلدەرىنە دە ەكسپورتتاۋ جوسپارلانۋدا — بۇعان دەيىن ەكسپورت باعىتتارىنىڭ قاتارىندا قىرعىزستان بار ەكەنى حابارلانعان.
«قازاقستان مەن دانيا گەوگرافيالىق تۇرعىدان بىر-بىرىنەن الىس ورنالاسقانىمەن، بۇل بىرلەسكەن جۇمىسقا كەدەرگى ەمەس. جاڭا كاسىپورىننىڭ اشىلۋى — سونىڭ ايقىن دالەلى ءارى بولاشاققا سالىنعان ورتاق ينۆەستيسيا. زاۋىت سونداي-اق ساۋدا كولەمىن ۇلعايتۋعا، جاڭا جۇمىس ورىندارىن اشۋعا، حالىقتىڭ ءال-اۋقاتىن ارتتىرۋعا جانە وندىرىسكە جاڭا تەحنولوگيالاردى ەنگىزۋگە مۇمكىندىك بەرەدى»، – دەدى اشىلۋ راسىمىنە قاتىسقان دانيانىڭ سىرتقى ىستەر ءمينيسترى لارس لوككە راسمۋسسەن.
ءبىرىنشى كەزەڭدە ءارتۇرلى دامدەگى سۋسىندار شىعارىپ، ولاردى قاپتايتىن بەس وندىرىستىك جەلى ىسكە قوسىلدى. بولاشاقتا كاسىپورىننىڭ لوگيستيكالىق ينفراقۇرىلىمىن، ونىڭ ىشىندە قويما قۋاتىن جانە دايىن ءونىمدى تاسىمالداۋ جۇيەسىن دامىتۋ جوسپارلانۋدا.
زاۋىتقا شيكىزات جەرگىلىكتى وندىرۋشىلەردەن ساتىپ الىنادى، بۇل ءونىم قۇنىن تومەندەتۋگە ىقپال ەتۋى ءتيىس. سونىمەن قاتار كاسىپورىندا ەنەرگيا ۇنەمدەيتىن تەحنولوگيالار ەنگىزىلگەن.
ەسكە سالايىق، الاتاۋدا PepsiCo كومپانياسىنىڭ تۇزدالعان جەڭسىك اس وندىرەتىن زاۋىتى دا سالىنىپ جاتىر. ونى 2026 جىلدىڭ ماۋسىمىندا اشۋ جوسپارلانعان. تولىق قۋاتقا شىققاندا كاسىپورىن جىلىنا 210 مىڭ تونناعا دەيىن كارتوپ وڭدەپ، 70 مىڭ توننا چيپسى شىعارادى.