Британдық Collins English Dictionary сөздігі 2026 жылдың сөзі деп «mogging» терминін жариялады. Бұл сөз бодибилдинг мәдениетінен шығып, әлеуметтік желілерде кең тараған, деп хабарлайды infohub.kz сайты.
Сөз біреудің өзге адамнан немесе заттан басым түсіп, соның аясында неғұрлым тартымды, сенімді не мәртебелі көрінетін жағдайын сипаттайды.
Термин алғашында бодибилдинг мәдениетінде пайда болды. Оны AMOG (alpha male of the group), яғни «топтағы альфа-еркек» тіркесінің қысқартылған нұсқасы деп санайды. Шамамен 2016 жылы бұл сөз спортзалдағы ең дене бітімі мықты еркекті білдіретін зат есім ретінде қолданылды. Кейін ол етістікке айналып, интернет-қауымдастықтарда тарады.
Қазір mogging сөзін түрлі жағдайда қолданады: жасөспірімдер кәсіби спортшылардан басым түскенде, жаңа бейнеойын ескісін көлеңкелегенде немесе біреудің үйде пісірген тоқашы өзгенікінен әдемірек көрінгенде. Көп жағдайда термин ирониямен қолданылады, делінген Collins жарияланымында.